Roteiro en feminino Sons de Mulleres

Na Galipedia, a Wikipedia en galego.
Saltar ata a navegación Saltar á procura

O Roteiro en feminino Sons de Mulleres é un itinerario proxectado por Mulheres Nacionalistas Galegas que sinalizou a Concellería de igualdade do Concello de Vigo, e que ten como obxectivo visibilizar as mulleres que, individual ou colectivamente, teceron a historia da cidade de Vigo. Realiza un percorrido por quince puntos situados fundamentalmente no casco histórico da cidade, nos que, dun ou doutro xeito, as mulleres deixaron a súa pegada e a súa contribución á identidade de Vigo.[1]

O I Roteiro en Feminino foi presentado en 2011 no Museo de Arte Contemporánea de Vigo nun acto que contou coa presenza de mulleres que colaboraron cos testemuños das súas vivencias persoais no traballo de campo do itinerario, así como de familiares das mulleres que nel se lembran.[2]

En 2012 foi inaugurada a sinalización nun acto realizado diante do punto nº 14 do itinerario, o espazo contra a Violencia de Xénero.[1] No acto interviñeron a concelleira de igualdade de Vigo, Chus Lago e a coordinadora do proxecto María Casar.[3]

Co gallo das celebracións do 8 de marzo, Día Internacional da Muller, a Concellería de Igualdade organiza visitas guiadas percorrendo o itinerario.[4]

Percorrido[editar | editar a fonte]

Recuperando a historia desde unha perspectiva de xénero, visibilizando e empoderando o labor realizado polas mulleres, nos 15 puntos do itinerario hai espazos que son froito das reivindicacións e do traballo máis recente do Movemento Feminista: a Praza 8 de Marzo, o Centro de Documentación e recursos feministas ou a Casa das Mulleres; lugares que recuperan a memoria de mulleres vítimas da represión franquista: Urania Mella, Olimpia Valencia ou Rosario Hernández -A Calesa-, que loitaron pola liberdade nas rúas da cidade, nos sindicatos e na vangarda cultural; Pedagogas que defenderon os dereitos das mulleres, loitando pola súa educación: Concepción Arenal, Ernestina Otero ou Antia Cal; lugares de creación artística e literaria, como foi a imprenta de Juan Compañel onde Rosalía de Castro sacou do prelo en 1863 Cantares gallegos; lugares que recoñecen o compromiso político; e lugares que recoñecen o traballo nas conserveiras, na ribeira do Berbés ou as ostreiras, nos lavadoiros comunais ou nos mercados, ou ás mulleres que tiveron que emigrar.[5]

Espazos sinalizados[editar | editar a fonte]

Visita guiada ao itinerario 2018. Lavadoiro A Barroca

Estes son os 15 puntos sinalizados do itinerario:[6]

  1. Praza 8 de marzo (Rúa Camelias 89-91)
  2. Casa das Mulleres (Rúa Romil, 20)
  3. Lavadoiro A Barroca (Poboadores)
  4. Berbés (Praza da Ribeira do Berbés)
  5. Imprenta Juan Compañel: Rosalía de Castro (Rúa Real, 12)
  6. Estación marítima: a emigración
  7. Ostreiras (Rúa Pescadería)
  8. Cesteiras (Rúa das Cesteiras)
  9. Mercado (Praza da Constitución)
  10. Centro de documentación e recursos feministas. (Biblioteca Juan Compañel. Rúa Joaquín Yáñez, 6)
  11. Olimpia Valencia López (Rúa do Príncipe, 11)
  12. Rosario Hernández "A Calesa" (Rúa do Príncipe, 44)
  13. Urania Mella. (MARCO. Antiga cadea de Vigo. Rúa do Príncipe, 54)
  14. Espazo contra a violencia de xénero (Rúa Ronda Don Bosco)
  15. Pedagogas e educadoras: Concepción Arenal, Ernestina Otero Sestelo, Antía Cal (Rúa Concepción Arenal, 6)

Galería de imaxes[editar | editar a fonte]

Nº 1: Praza 8 de Marzo 
Nº 2: Casa das Mulleres 
Nº 3: Lavadoiro A Barroca 
Nº 6: A emigración 
Nº 7: Ostreiras 
Nº 8: Cesteiras 
Nº 9: Mercado 
Nº 10: Centro de documentación e recursos feministas 
Nº 11 Olimpia Valencia 
Nº 12 Rosario Hernández 
Nº 13: Urania Mella 
Nº 14: Espazo contra a violencia de xénero 

Notas[editar | editar a fonte]

  1. 1,0 1,1 "Vigo estrea a súa primeira ruta en femenino". Vigo al minuto (en castelán). 2012-12-15. Consultado o 2020-10-25. 
  2. "Descubrindo a historia de Vigo polo seu I Roteiro en Feminino Sons de Mulleres". Feminismo na Galiza. 2011-12-20. Consultado o 2020-10-25. 
  3. "Camiñar por Vigo na procura da historia das mulleres". Nós Diario. Consultado o 2020-11-08. 
  4. "Un roteiro guiado para as “descoñecidas e esquecidas” de Vigo". Metropolitano. 2018-03-20. Consultado o 2020-10-25. 
  5. "Relatorio "Camiñando por Vigo na procura da historia das mulleres. Roteiro feminino Sons de mulleres"". xornal.vigo.org. Consultado o 2020-10-25. 
  6. "Sinalización do Roteiro en Feminino "Sons de Mulleres"". Concellería de Igualdade. Concello de Vigo. 12 de decembro de 2012.