Ribes hirtellum é unha especie de groselleira espiñenta americana pertencente á familia Grossulariaceae[1] nativa do nordés e centro-norte de América do Norte.[2] As groselleiras de cultivo derívanse desta especie e da groselleira espiñenta europea.
Os cultivos da groselleira espiñenta europea (R. uva-crispa) foron devastados polo mofo da groselleira americana Podosphaera mors-uvae (syn: Sphaerotheca mors-uvae ), que se introduciu accidentalmente de Europa, e ao que a R. hirtellum é resistente. Esta é unha das catro especies americanas que se cruzaron con R. uva-crispa para producir cultivares resistentes similares ao orixinal R. uva-crispa.[3] O cultivar 'Houghton' é un dos obtidos polo cruzamento de R. uva-crispa con R. hirtellum.
Ribes: nome xenérico que segundo parece procede do áraberabas; en persarawas e rawash = nome en oriente dun ruibarbo (Rheum ribes L., poligonáceas). Afírmase que ribes figura por primeira vez en occidente na tradución que Simón Januensis fixo, na segunda metade do século XIII, do libro de Ibn Sarab do Serapión –Liber Serapionis aggregatus in medicinis simplicibus...– e que este nome foi adoptado polos menciñeiros. En todo caso, aplicouse a plantas diferentes, como ás groselleiras (Ribes sp. pl.), quizais polos seus froitos acedos e polas súas propiedades medicinais semellantes.[5]
