Manfred Gnädinger

Na Galipedia, a Wikipedia en galego.
Manfred Gnädinger
Man 19980715.jpg
Man en xullo de 1998.
Data de nacemento 27 de xaneiro de 1936
Lugar de nacemento Radolfzell
Data de falecemento 28 de decembro de 2002 (66 anos)
Lugar de falecemento Camelle, Camariñas
Área pintor e escultor
Movemento Land art e arte marxinal

Manfred Gnädinger, coñecido como Man ou O alemán de Camelle, nado en Radolfzell o 27 de xaneiro de 1936 e falecido en Camelle o 28 de decembro de 2002, foi un pintor e escultor ermitán de nacionalidade alemá que viviu durante corenta anos na praia de Camelle, pertencente ó término municipal de Camariñas, na costa da Morte en Galicia. Tratou de levar unha vida o máis sinxela e natural posible, creando unha peculiar paisaxe de pedra preto da praia onde vivía e coidando o seu pequeno xardín.

Traxectoria[editar | editar a fonte]

Man camelle 1.jpg

Nace e pasa a súa infancia en Alemaña, procedente dunha familia de sete irmáns, estudou Artes en Italia. Impartiu clases de arte en Suíza a persoas con problemas de integración social. O seu interese pola preservación do medio ambiente e a curiosidade por coñecer a costa galega levárono á Costa da Morte. En maio de 1961 chegou a Camelle, inmerso nas festas patronais do Espírito Santo. Dende ese día ese alemán solitario, educado e de bo aspecto, con certo aire de turista acomodado, instalouse para sempre no pobo.

Viviu até á súa morte da axuda dos veciños e do que lle aportaba mostrar a súa arte nas rochas nas que habitaba (un euro por persoa no último ano máis a obriga de deseñar nun caderno o que máis chamase a atención). A súa morte, natural, vinculouse no imaxinario popular coa indignación provocada pola catástrofe do petroleiro Prestige e a marea negra que provocou.

O 9 de novembro de 2010, un temporal levou o que quedaba da súa obra.[1]

Obra[editar | editar a fonte]

En tanto como escultor pódese clasificar nas artes contemporáneas do Land art, e a arte marxinal. Na súa memoria foi creado en Camariñas o Museo do Alemán, actualmente atópase en estado de abandono [2].

O autor e a súa obra fixeron coñecida no mundo enteiro á vila de Camelle (Camariñas), ata tal punto que é prácticamente imposible atopar na rede información deste lugar na que non se faga referencia a Man, e viceversa. A posta en valor e a recuperación do legado de Man, tamén o é, por extensión do porto de Camelle e a súa contorna, nos que Man non só creou, senón que converteu no seu fogar e no seu propio proxecto museístico espontáneo.

O traballo que Man realizou ao longo dos anos nas inmediacións do espigón de Camelle quedou debastado por mor do vandalismo e das últimas catástrofes climatolóxicas da zona. A obra que persiste actualmente no xardín-museo, único xardín mariño de esculturas no mundo, non representa o seu estado orixinal.

En 2014 iniciouse un proxecto denominado MAN: mar, arte e natureza, que ten por obxectivo recuperar a obra de Man e expoñela tanto na "Casa do Alemán" coma en Internet, por medio dunha exposición virtual.

Notas[editar | editar a fonte]

Véxase tamén[editar | editar a fonte]

Commons
Wikimedia Commons ten máis contidos multimedia na categoría: Manfred Gnädinger Modificar a ligazón no Wikidata

Bibliografía[editar | editar a fonte]

  • Abeleira, Xoán (2006). A pegada de Man. Vigo: Edicións Xerais de Galicia. ISBN 84-9782-464-4. 
  • Cequera, Bernardo: Manfred, o alemán de Camelle. Documental 60 minutos 2008

Ligazóns externas[editar | editar a fonte]