Janthinobacterium lividum

Janthinobacterium lividum
Clasificación científica
Dominio: Bacteria Filo: Proteobacteria Clase: Betaproteobacteria Orde: Burkholderiales Familia: Oxalobacteraceae Xénero: Janthinobacterium Especie: J. lividum
Nome binomial
Janthinobacterium lividum (Eisenberg 1891) De Ley et al. 1978 (Approved Lists 1980)
Sinonimia
Bacillus lividus Eisenberg 1891 Bacillus violaceus berolinensis Kruse 1896 Bacterium lividus [sic] (Eisenberg 1891) Chester 1897 Bacillus berolinensis Chester 1901 Chromobacterium lividum (Eisenberg 1891) Bergey et al. 1923 Chromobacterium violaceum Ford 1927 Chromobacterium amethystinum Breed et al. 1957 Chromobacterium violaceum Leifson 1956 Pseudomonas mephitica Claydon and Hammer 1939

Janthinobacterium lividum é unha especie de bacterias aerobias, gramnegativas, habitantes do solo, que teñen unha característica cor violeta escura (case negra). Esta cor débese a que produce un composto chamado violaceína, a cal se xera cando se metaboliza o glicerol como fonte de carbono. A violaceína ten propiedades antibióticas antibacterianas, antifúnxicas e mesmo antivirais. As súas propiedades antifúnxicas son de especial interese porque J. lividum se atopa na pel de certos anfibios, como a píntega Plethodon cinereus, na que prevén a infección polo devastador fungo quitridio Batrachochytrium dendrobatidis.

Etimoloxía e sinonimia

O nome do xénero, Janthinobacterium, significa en latín "bacteria de cor violeta" (ou violeta-azulada). O nome da especie, lividum, tamén vén do latín e significa "de cor azul ou do chumbo".

Na caixa de datos taxonómicos indícanse os distintos sinónimos con que se foi coñecendo esta bacteria ao longo do tempo. Durante un tempo tivo o sinónimo Chromobacterium violaceum Ford 1927 e despois Leifson 1956, que xa non se usa, e non se debe confundir coa actual bacteria Chromobacterium violaceum, que é unha especie distinta da orde Neisseriales, pero que tamén produce violaceína e ten cor violeta escura.