O Dong Fang Ocean, anteriormente coñecido como Exxon Valdez, Exxon Mediterranean, SeaRiver Mediterranean, S/R Mediterranean e Mediterranean, foi un buque petroleiro que cobrou relevancia tras encallar na baía do Príncipe Guillerme, onde verteu uns 41.000 m³ (260.000 barrís, 37.000 toneladas métricas)[1] de petróleo na costa de Alasca mentres era propiedade de ExxonMobil. Esta foi a segunda maior vertedura petrolífera da historia dos Estados Unidos. Foi, en 1989, a 54 maior vertedura da historia.
O desastre do Exxon Valdez foi unha vertedura de petróleo provocada por este petroleiro logo de encallar o 24 de marzo de 1989 en Prince William Sound, Alasca, cando transportaba unha carga dunhas 181.000 toneladas de cru, das cales verteu 37.000 toneladas de hidrocarburo.[2][3][4]
Alasca viviu a peor traxedia ecolóxica da súa historia ao encallar o petroleiro e verter millóns de litros de cru que se expandiron sobre máis de 2.000 quilómetros de costa. Para a limpeza da marea negra utilizáronse aspiradores, mangueiras de auga quente a presión, e trasladouse o cru que aínda contiña o Exxon Valdez a outro petroleiro. Os danos á fauna que se produciron nesta zona aínda se seguen a estudar.
A vertedura conduciu á aprobación dunha nova lexislación ambiental nos Estados Unidos de América (a Oil Pollution Act de 1990).
