Domaio, Moaña

Domaio
	Igrexa parroquial.
Concello	Moaña
Provincia	Pontevedra
Poboación	2.127 hab. (2014)
Entidades de poboación	6
	[ editar datos en Wikidata ]

Coordenadas: 42°17′06″N 08°42′44″O / 42.28500, -8.71222

San Pedro de Domaio é unha parroquia que se localiza no concello pontevedrés de Moaña na comarca do Morrazo. Segundo o IGE^[2], en 2014 tiña 2127 habitantes (1030 homes e 1097 mulleres), 75 máis ca en 2004. Ten seis entidades de poboación.

Xeografía[editar | editar a fonte]

A parroquia está situada na ría de Vigo, ao leste do concello de Moaña, lindando co veciño municipio de Vilaboa a través da parroquia de Cobres.

Patrimonio[editar | editar a fonte]

No Regueiriño achouse un importante asentamento correspondente ó neolítico final, e na Fontenla documentouse por primeira vez en Galicia a presenza de elementos da cultura do vaso campaniforme fóra de ambientes funerarios. Acháronse tamén na zona ferramentas e armas de cobre e bronce, e consérvanse petróglifos. Da época castrexa é o castro de Montealegre.

A igrexa parroquial de san Pedro é un templo de estilo barroco serodio. Foi construída no século XVIII, logo de que en 1702 a parroquia fose saqueada logo da batalla de Rande. O templo está situado na enseada de Mouro, preto do estreito de Rande. Ten planta rectangular dunha soa nave e presbiterio cadrado con cuberta a catro augas. A gran torre campanario está situada no centro da fachada occidental, e ten dous corpos superpostos: o primeiro, de planta cadrada, con arcos de medio punto abertos nas catro caras, flanqueados por pilastras acaroadas, e rodeado completamente por un monumental balcón balaustrado. O segundo corpo, máis pequeno, é un macizo cilíndrico coroado con cupuliña. Complementan a decoración piramidóns rematados en bóla nos extremos da fachada e no alto das catro esquinas da torre. No interior do templo hai dous retablos barrocos do século XVIII, un deles datado en 1786.

Outro templo relixioso é a ermida de san Bieito, situada no lugar do Calvar.

O Campo de Golf Ría de Vigo foi inaugurado en 1993.