Comunidades Europeas

Na Galipedia, a Wikipedia en galego.
CE 1990

As Comunidades Europeas son dúas organizacións internacionais (foron tres coa extinta Comunidade Europea do Carbón e do Aceiro) de cooperación económica, infraestrutura xurídica e funcional da Unión Europea: a Comunidade Europea (antiga Comunidade Económica Europea) e a Comunidade Europea da Enerxía Atómica. Estas comunidades axudaron a crear unha forte unión económica entre os seus países membros. A intención era incentivar a cooperación entre os países europeos, asoballados por dúas guerras mundiais na primeira metade do século XX, para fomentar así unha solidariedade entre os estados que garantise a paz. Todos os países membros formaban parte das tres. Co Tratado de fusión (ou Tratado de Bruxelas) de 1965 crearíase un único poder executivo para as tres, constituíndo o xermolo da futura Unión Europea.

As Comunidades[editar | editar a fonte]

CECA[editar | editar a fonte]

Foi a primeira comunidade. Creada por seis Estados: Alemaña, Francia, Italia, e os tres países do Benelux (Bélxica, Países Baixos e Luxemburgo). Ocuparíase dos sectores do Carbón e do Aceiro deses seis países. Fundada no ano 1951, é considerada a "semente" da Unión Europea por ser a primeira Comunidade Europea. O tratado de fundación da devandita comunidade tiña unha validez de 50 anos, expirando o 2002 e quedando os seus eidos de decisión dentro da actual Comunidade Europea (herdeira directa da CEE).

CEE[editar | editar a fonte]

Artigo principal: Comunidade Económica Europea.

A máis importante, sen dúbida, das tres Comunidades Europeas. Foi fundada polos mesmos membros da CECA, no ano 1957, por un dos dous Tratados fundacionais de Roma, uns anos despois de que se demostrase que era un éxito. Esta vez, non se lle poñería un prazo de validez en anos ao tratado. Nesta nova Comunidade Europea (a CEE), trataríanse distintos e variados temas, todos económicos, que servirían para ampliar aínda máis a cooperación dos Estados europeos que quixesen formar parte dela. Entre algunha das cousas importantes que se farán nesta comunidade, están, entre outras cousas, establecer un arancel exterior común, unha política agrícola conxunta (a PAC), e crear institucións para o desenvolvemento económico de todos os países da CEE. A CEE desapareceu como tal, e pasou a chamarse Comunidade Europea (CE) despois do Tratado de Maastricht de 1992. Nese mesmo tratado, estableceuse que as tres Comunidades Europeas, a CECA, a CE (anterior CEE), e a CEEA (ou EURATOM), pasarían a formar parte da nova Unión Europea. Confúndese moitas veces a CEE coa actual CE (Comunidade Europea), e coa UE (Unión Europea), cando en realidade, non son exactamente o mesmo (aínda que a CE é a herdeira directa da desaparecida CEE, e á súa vez, a actual CE é só unha parte da Unión Europea).

CEEA (EURATOM)[editar | editar a fonte]

A CEEA, ou EURATOM, crearase o mesmo día cá CEE, no ano 1957, creada polo outro Tratado Fundacional de Roma, e terá como finalidade establecer un mercado común de produtos nucleares, e o desenvolvemento pacífico da enerxía nuclear entre os seus países membros. Tampouco, ao igual cá CEE, terá un prazo marcado de anos para a súa existencia. Unha vez máis, todos os membros destoutra comunidade (a terceira) tamén o son da CECA e da CEE. É posiblemente a menos coñecida das tres Comunidades Europeas.

Estas tres Comunidades Europeas, a CECA, a CEE, e a CEEA (ou EURATOM), grazas á sinatura dos seus Estados membros do Tratado de fusión (ou Tratado de Bruxelas) de 1965 terán un mesmo poder executivo e compartirán as mesmas institucións e órganos a partir de entón.

A partir do Tratado de Maastricht[editar | editar a fonte]

En 1992, logo da ratificación do Tratado da Unión Europea (Tratado de Maastricht), as tres comunidades pasan a formar parte desta nova organización supranacional (é dicir, unha organización internacional con carácter político, algo ata entón nunca visto). Deste xeito, a nova Unión Europea absorbe as tres comunidades e méteas dentro do seu primeiro alicerce. O segundo alicerce da Unión Europea basearase na seguridade e defensa común, e o terceiro alicerce será para a cooperación policial e xudicial entre os seus Estados membros. O segundo e o terceiro alicerce créanse no mesmo Tratado de Maastricht, e aínda hoxe en día, están nunha fase de desenvolvemento temperá.

Dentro da Unión Europea hai tres alicerces, e dentro do primeiro atópanse as dúas Comunidades Europeas que aínda sobreviven', a CE e a EURATOM (ou CEEA), logo da desaparición da CECA no ano 2002.

As Comunidades Europeas foron a base sobre a que se estableceu a actual Unión Europea, pero hoxe en día, as dúas Comunidades que quedan só forman un dos tres alicerces da UE.

Véxase tamén[editar | editar a fonte]

Outros artigos[editar | editar a fonte]