Cangas, Foz

Para outras páxinas con títulos homónimos véxase: Cangas (homónimos).

Cangas
Vista da igrexa parroquial
Concello	Foz
Provincia	Lugo
Coordenadas	43°37′47″N 7°20′05″O
Área	9,25 km²
Poboación	796 hab. (2020)
Densidade	86,05 hab./km²
Entidades de poboación	7
[ editar datos en Wikidata ]

San Pedro de Cangas é unha parroquia do concello de Foz, na provincia de Lugo, cunha superficie de 9,25 km². Segundo o Instituto Galego de Estatística en 2017 tiña 813 habitantes (411 mulleres e 402 homes) distribuídos en 7 entidades de poboación, o que supón unha diminución en relación ao ano 1999 cando tiña 877 habitantes.

Xeografía

Cangas está situada no extremo noroccidental do concello de Foz, nunha zona limitada ao Sur pola parroquia de Cordido deste mesmo concello, ao leste pola parroquia de Nois (concello de Foz), ao Norte polo mar Cantábrico e ao oeste polo concello de Burela.

O territorio parroquial sitúase no val inferior do río Moucide, que cruza a parroquia en sentido norte-sur até a súa desembocadura no Cantábrico na zona denominada Riosmar. As maiores altitudes acádanse na zona occidental, no límite con Burela, onde se acadan alturas de até 460 m no denominado Pico do Pelobrinco, nunha zona onde os montes do Buio acadan a zona costeira á altura da praia da Areoura.

Economía

Aínda que situada no concello de Foz, a vida socioeconómica da súa poboación está moi ligada á vila de Burela, no concello homónimo, da que dista ao redor 3 quilómetros (8 km da capital municipal de Foz). As tradicionais ocupacións agrogandeiras deron paso nos últimos anos a unha base económica máis diversificada, estando moitos dos seus habitantes empregados no sector terciario (basicamente no comercio e nos equipamentos administrativos existentes nas próximas poboacións de Burela e Foz) ou no sector industrial, principalmente na fábrica de alumina e aluminio que a multinacional Alcoa ten en San Cibrao. Tamén é importante, aínda que cada vez menor, o número dos seus habitantes que está enrolado nos barcos pesqueiros con base no porto de Burela.

Patrimonio

• Pazo do Lagar, pazo do século XVI no lugar da Ribela.
• Pazo de Vilachá, pazo do século XVII da familia Almuíña, no lugar de Vilachá.
• Co código 125A, no Catálogo de Árbores senlleiras de Galicia aparece a Moreira negra de Cangas de Foz.

Galería de imaxes

Artigo principal: Galería de imaxes de Foz.

• 
  Parroquia de Cangas.
• 
  Portiño de San Pedro.
• 
  Praia das Polas
• 
  Pena Orxal
• 
  Cangas desde o Coto do Faro.

Véxase tamén

Outros artigos

• Lugares de Foz