Bandeira de Cantabria

Bandeira de Cantabria
Características
Uso	...
Proporción	2:3
Adopción	22 de decembro de 1984
Cores	Branco      Vermello

A bandeira de Cantabria é un dos símbolos de Cantabria, unha comunidade autónoma de España. As cores da bandeira oficial foron estabelecidas no seu Estatuto de Autonomía. Componse de dúas franxas horizontais iguais, sendo a branca a superior e a vemella a inferior, co escudo da comunidade no seu centro xeométrico.

Historia

Cando, por Real Orde de 30 de xullo de 1845, se asignaron as bandeiras que corresponderían ás diferentes matrículas das provincias marítimas de España, todas elas recibiron como contrasinal deseños aleatorios nas cores azul, vermello, amarelo e branco. Algúns autores defenden que non foi así para a provincia marítima de Santander, na cal se respectou a súa bandeira branca e vermella. Segundo as teses dos historiadores que apoiaron a asunción do estandarte branco e vermello da provincia marítima de Santander pola comunidade autónoma de Cantabria, o seu contrasinal é o único en España anterior á Real Orde de 30 de xullo de 1845 que respectou a súa bandeira branca e vermella empregada cando menos dende o século XVIII por barcos e tropas cántabras. Porén, non existe unanimidade ao respecto xa que as evidencias achegadas sobre o seu uso antes da Real Orde foron refutadas por diversos autores con posterioridade.

Recreación contemporánea do lábaro cántabro.

En calquera caso, a bandeira foi amplamente asumida como emblema na rexión, até o punto que a propia cidade de Santander, que posuía bandeira propia branca e azul, chegou a substituíla pola da matrícula marítima, até que na segunda década do século XX, un informe de Fresnedo de la Calzada propiciou un deslinde dos campos, pasándose a usar a branca e azul para a capital e a branca e vermella pola daquela deputación provincial; sendo posteriormente asumida pola comunidade autónoma cántabra.

No ano 2016, atendendo ás reivindicacións de diversos colectivos tanto sociais como políticos, recoñeceuse oficialmente como símbolo representativo e identitario do pobo cántabro unha segunda bandeira que fora desestimada no proceso autonómico, o lábaro cántabro.

Outras bandeiras históricas

• 
  Versión alternativa do lábaro, con dúas cenefas e unha circunferencia rodeando os catro crecentes lunares de Barros.
• 
  Bandeira real de Ramiro I (842-850), descendente directo de Pedro de Cantabria.
• 
  Interpretación moderna do lábaro cántabro (c. 1703).
• 
  Contrasinal da provincia marítima de Santander (século XVIII-presente; oficial dende 1845).
• 
  Bandeira dun batallón da División Cántabra, 1809. Nas súas esquinas, o lábaro cántabro.
• 
  Bandeira de ADIC, proposta na Transición como bandeira oficial de Cantabria xunto ao lábaro e a bandeira actual.

Véxase tamén

Bibliografía

• VV.AA.: Gran Enciclopedia de Cantabria. Santander: Cantabria, 1985 (8 tomos) e 2002 (tomos 9, 10 e 11). ISBN 84-86420-00-8

Outros artigos

• Lábaro cántabro