Hipoderma

Na Galipedia, a Wikipedia en galego.
Sección da pel que mostra as súas capas. O subcutis indica o hipoderma.

O hipoderma[1] é a capa máis profunda do sistema tegumentario dos vertebrados, situada debaixo da derme [2]. Ás veces utilízase para referirse a el o termo "tecido subcutáneo", que é anatomicamente máis impreciso e máis inexacto. O hipoderma consiste principalmente en tecido conxuntivo laxo e lóbulos de graxa. As súas fibras coláxenas e elásticas discorren principalmente paralelas á superficie da pel, continúanse coas da derme e conectan coas estrutruras máis profundas; son numerosas na planta dos pés e palmas das mans, onde fixan fortemente a pel ás estruturas inferiores, pero noutras zonas do corpo a cantidade de fibras é menor. Contén vasos sanguíneos máis grandes ca os da derme e nervios. Os tipos de células que se encontran no hipoderma son fibroblastos, adipocitos, e macrófagos. [3] A función do hipoderma é principalmente protectora e de almacenamento de graxa.

O hipoderma deriva do mesoderma embrionario.

Compoñentes[editar | editar a fonte]

Contén:

Graxa subcutánea[editar | editar a fonte]

A graxa subcutánea está xusto debaixo da pel e diferénciase da graxa visceral, que se encontra na cavidade peritoneal. Esta graxa forma unha capa illante que evita as perdas de calor. Nalgúns animais como as baleas, focas e animais hibernantes, ademais do illamento térmico é unha reserva de graxa para a nutrición. A cantidade de células adiposas que contén o tecido subcutáneo depende das rexións do corpo e da nurtrición. No abdome humano pode chegar a ter 3 cm ou máis, pero non existe noutras zonas como as pálpebras ou pene.

Inxección subcutánea[editar | editar a fonte]

É unha inxección administrada no tecido subcutáneo, utilizada, por exemplo, para administrar a insulina.

Noutros seres vivos[editar | editar a fonte]

O termo utilízase tamén noutros seres vivos non vertebrados, pero con outros significados.

Nos artrópodos chámase hipoderma a unha capa epidérmica de células que segrega o seu exoesqueleto quitinoso.

Algunhas plantas teñen unha capa diferenciada de células debaixo da epiderme denominada hipoderme. Por exemplo, nas follas dos piñeiros forma unha capa extra protectora.

Notas[editar | editar a fonte]

  1. Dicionario da Real Academia Galega - Hipoderma [1]
  2. Mosby’s Medical, Nursing and Allied Health Dictionary, Fourth Edition, Mosby-Year Book 1994, pp. 998, 774, 1497
  3. D. W. Fawcett. Tratado de Histología. Editorial Interamericana-Mc. Graw Hill. 11ª edición. Páxina 565. ISBN 84-7605-361-4.

Véxase tamén[editar | editar a fonte]

Outros artigos[editar | editar a fonte]