Wario Land 3, coñecido no Xapón como Wario Land 3: Fushigi na Orgel (ワリオランド3 不思議なオルゴ～ル, lit. "Wario Land 3: The Mysterious Music Box", traducíbel ao galego como Wario Land 3: A misteriosa caixa musical), é un videoxogo estreado para Game Boy Color no 2000.[1] Neste xogo, o rival de Mario, Wario debe ceibar unha misteriosa figura que está atrapada nunha caixa de música. Lanzouse para a Virtual Console de Nintendo 3DS en 2013,[2] e como parte do servizo de Nintendo Switch Online o 8 de febreiro de 2023.[3]
O videoxogo é semellante ó seu antecesor Wario Land II. Wario é inmortal pero aínda así os inimigos pódeno danar, e polo tanto os crebacabezas serán máis complicados. Malia que algúns inimigos outorgaranlle transformacións que se poderán usar para acceder a outras áreas, o protagonista deberá viaxar por tódolos niveis para poder atopar novas habilidades e tesouros para poder acceder a outros niveis e completar o xogo. O mundo da caixa de música divídese en catro áreas: Leste, Oeste, Norte e Sur; cada unha cos seus niveis.
Cada nivel ten catro cofres de tesouros coas súas chaves cada unha. As cores dos cofres están na orde aproximada na que están pensados para ser abertos; gris, vermello, verde e azul. Esta orde non é fixa, xa que a miúdo cando un cofre do tesouro non pode ser alcanzado, Wario debe retroceder e recuperar un novo artigo para facelo accesible.
