Ullaza

Ulassa (ou Ullaza) foi un porto da costa libanesa uns 20 km ao norte de Biblos. A súa situación exacta non se puido atopar aínda definitivamente. Para a metade do século –XV o faraón exipcio Tuthmosis III, que xa fixera campaña en Siria, volveu á rexión; construíu unha frota que levaba as tropas por mar, desembarcando na costa do Líbano onde ocuparon Ullaza (poucos km ao norte da moderna Trípoli), que pertencía ao reino de Tunip, vasalo de Mitanni; desde Ullaza capturou a cidade non afastada de Ardata. Despois saqueou o territorio de Qadesh, pero non puido ocupar a cidade e, á volta, atopouse cunha Ardata rebelada. Nesta campaña conquistouse tamén Sumur, importante cidade ao norte de Ullaza. Durante os dous seguintes anos preparou a ofensiva contra Mitanni e, neste tempo, Tunip fomentou unha revolta en Ullaza que os exipcios tiveron que acorar. Na súa oitava campaña de Siria desembarcou en Ullaza e dirixiuse ao Orontes polo territorio de Qatna e para o norte; o rei de Mitanni retirouse e non presentou batalla.

Sobre a metade do século –XIV a cidade caeu en mans dos apiru de Amurru. Pu-Bahla, fillo do primeiro xefe Abdi-Asirta, ocupouna e converteuna na súa capital, dominando tamén Ardata, Wahliya, Ampi e Sigata.

Sobre o -1330 quedou incluída no reino de Amurru establecido polo rei hitita Suppiluliumas I.