Tokyo Dome
Coordenadas: 35°42′20.37″N 139°45′6.89″L / 35.7056583, -139.7519139
| Tokyo Dome | |
|---|---|
 | |
| Datos | |
| Localización | Bunkyō, Xapón |
| Alcume | The Big Egg (o Gran Ovo) |
| Construción | |
| Construción | 16 de maio de 1985 |
| Inauguración | 17 de marzo de 1988 |
| Arquitecto | Takenaka Kōmuten, Nikken Sekkei |
| Custo | ¥ 35.000 millóns |
| Estadio | |
| Superficie | Céspede artificial |
| Dimensións | Left Field – 100 m (328,1 ft) Left Center Field – 110 m (360,9 ft) Center Field – 122 m (400,3 ft) Right Center Field – 110 m (360,9 ft) Right Field – 100 m (328,1 ft) |
| Capacidade | 46.000 espectadores |
| Propietario | Tokyo Dome Kigyō |
| Localía | Yomiuri Giants (1988–presente) Nippon-Ham Fighters (1988–2003) |
O Tokyo Dome (東京ドーム Tōkyō Dōmu?), alcumado The Big Egg (do inglés: o Gran Ovo), é un parque de béisbol situado no barrio de Bunkyō, en Toquio (Xapón). O estadio foi comezado a construír o 16 de maio de 1985 e inaugurado o 17 de marzo de 1988. Foi construído onde estaba o Velódromo, ao lado do antigo estadio Kōrakuen Kyūjō. Ten capacidade para 55.000 espectadores, 46.000 no caso de estaren todos sentados.[1] Desde 1988 é o estadio local dos Yomiuri Giants da Liga Central da Nippon Professional Baseball (NPB). Entre 1088 e 2003 tamén foi sede dos Nippon-Ham Fighters da Liga do Pacífico da NPB. Ten albergado tamén encontros doutros desportes como o fútbol, fútbol americano ou artes marciais, así como concertos. No estadio está situado tamén o Salón da Fama do béisbol xaponés.
Historia[editar | editar a fonte]
O Tokyo Dome foi inaugurado o 17 de marzo de 1988 como o primeiro estadio cuberto de béisbol do Xapón.[2] A construción, que se fixo sobre os terreos do recinto deportivo de Kōrakuen, levouna a cabo a Corporación Takenaka cun custo total de 35.000 millóns de yenes. O recinto foi inaugurado cun partido de exhibición entre os mellores xogadores da Liga Xaponesa de Béisbol Profesional (NPB). Tres días máis tarde acolleu o campionato unificado do peso pesado de boxeo entre Mike Tyson e Tony Tubbs.
Desde a súa apertura é o fogar dos Yomiuri Giants. Tamén foi utilizado polos Nippon-Ham Fighters até que a franquía se trasladou a Sapporo en 2004. A pesar de que os afeccionados xaponeses ao béisbol tiñan receos sobre un estadio cuberto, o Tokyo Dome resultou un éxito e serviu de inspiración para construír outros recintos cubertos no país, como o Osaka Dome e o Sapporo Dome. No que respecta a concertos musicais, o primeiro artista en actuar no Tokyo Dome foi Mick Jagger o 22 e 23 de marzo de 1988, dentro da súa xira mundial en solitario.[3] O primeiro grupo xaponés en actuar no estadio foi Hound Dog. O recinto alcanzou fama internacional grazas á xira Bad World Tour de Michael Jackson, quen actuou en nove concertos en decembro de 1988 para un total de 405.000 espectadores.
O 29 de marzo do 2000 o Tokyo Dome acolleu un partido das Grandes Ligas de Béisbol entre Chicago Cubs e New York Mets, sendo a primeira visita da liga norteamericana a Xapón.[4] Desde entón, a MLB organizou algúns partidos de inicio de tempada nese campo.[5] Tamén acolleu partidos de exhibición de fútbol americano desde 1989 até 2005.[6]
Carecterísticas[editar | editar a fonte]
A construción do Tokyo Dome estivo inspirada no estadio multiusos Metrodome de Minneapolis (1982−2013). O seu teito en forma de domo está cuberto por dentro cunha cúpula flexíbel inflábel; para manter a diferenza de presión ha trinta e seis ventiladores e un sistema de esclusas de aire.[7] O edificio ocupa unha área de 46.755 m², mentres que a superficie é de 13.000 m². Respecto ao campo de béisbol, de céspede artificial FieldTurf, a altura do valo é de 100 metros nos extremos e de 122 metros no centro do outfield.[8] O Tokyo Dome forma parte dun complexo maior no barrio de Bunkyō, coñecido como Tokyo Dome City, que dispón de parques de atraccións, augas termais, hoteis, unha galería de arte, o pavillón deportivo Kōrakuen e o pavillón multiusos City Hall. Pode chegarse en transporte público a través das estacións de Kōrakuen (Metro de Toquio), Suidōbashi (JR East) e Kasuga (Metro Toei).[9]
Notas[editar | editar a fonte]
- ↑ "東京ドームとは". Tokyo-Dome.co.jp. Consultado o 5 de maio de 2019.
- ↑ Haberman, Clyde (23 de marzo de 1988). "Amid Some Doubts, a Tokyo Dome". The New York Times (en inglés). ISSN 0362-4331. Consultado o 5 de maio de 2019.
- ↑ Cahoon, Keith (5 de maio de 1988). "Mick Jagger Tour Rolls in Japan". Rolling Stone (en inglés). Consultado o 5 de maio de 2019.
- ↑ "Chicago Cubs at New York Mets Box Score, March 29, 2000". Baseball-Reference.com (en inglés). Arquivado dende o orixinal o 27 de marzo de 2019. Consultado o 5 de maio de 2019.
- ↑ "Mariners, Athletics arrive in Tokyo for MLB season-opening series". The Japan Times Online (en inglés). 15 de abril de 2019. ISSN 0447-5763. Consultado o 5 de maio de 2019.
- ↑ Nagatsuka, Kaz (4 de febreiro de 2015). "Fans want NFL return". The Japan Times Online (en inglés). ISSN 0447-5763. Consultado o 5 de maio de 2019.
- ↑ "Tokyo Dome". Mimoa (en inglés). Arquivado dende o orixinal o 05 de maio de 2019. Consultado o 5 de maio de 2019.
- ↑ "Tokyo Dome Corporation Report" (PDF). marketscreener.com (en inglés).
- ↑ "Viajar a Tokio: Tokyo Dome City". Japonismo (en castelán). 26 de outubro de 2012. Consultado o 5 de maio de 2019.
