Río Serpis

Río Serpis
País	España
Nacemento	serra de Mariola, Parc natural del Carrascal de la Font Roja
Lonxitude	74,5 km
Desembocadura	Mar Mediterráneo
Mapa da conca do Serpis.

Riu Serpis ao paso por Gandia.

O Serpis é un río do País Valenciano de 74,5 km de curso, que desemboca no mar Mediterráneo.

Percorrido

O río Serpis fórmase nas abas da serra de Mariola, no Parc natural del Carrascal de la Font Roja, na provincia de Alacant, pola unión dos barrancos de Polop e Troncal, e nas abas de La Carrasqueta, aínda que popularmente se recoñece o nacemento do Serpis na unión do río Barxell e o Molinar. Durante o seu curso alto é denominado tamén Río de Alcoi. Atravesa as comarcas de L'Alcoià, El Comtat e La Safor. A partir de L'Orxa, o seu leito estreita e discorre por unha angosta garganta entre a serra de Agullent e o macizo de La Safor. Este tramo encaixado é chamado o Barranc de l'Infern (barranco do inferno). Atravesa a cidade de Gandia, e desemboca no Mediterráneo xunto ao Grau ou porto de Gandia.

Conca

A área da conca do Serpis é de 752,8 km².

Afluentes

• Pola esquerda:
  • Río Barxell ou Riquer.
  • Río de Agres.
  • Río Vernissa.
• Pola dereita:
  • Río de Penáguila.

Réxime fluvial

É de tipo mediterráneo, con máximo caudal en xaneiro e mínimo en agosto. Ten fortes cheas en outono como consecuencia de chuvias torrenciais. Durante a chea do 1 de outubro de 1986 chegou a levar 770 m³/s en Beniarrés. Na data de 3 de novembro de 1987 desbordouse en Gandia a causa da precipitación de 720 mm en 24 horas. O caudal medio ao seu paso por Orxa é de 2,5 m³/s.

Poboacións que atravesa

Alcoi, Cocentaina, Alquería d'Asnar, Muro d'Alcoi, Beniarrés, L'Orxa, Villalonga, La Font d'en Carròs, Potries, Beniarjó, Gandia.

Encoros

• Encoro de Beniarrés, con 30 hm³ de capacidade para uso agrícola.
• Presa de La Font d'en Carròs de recente construción, con 71 hm³.

Protección ambiental

O Serpis é un río que recibe os residuos de importantes zonas industriais, como Alcoi, polo que as súas augas non son de boa calidade en certos tramos, porén as marismas de Xeresa-Xaraco teñen a declaración de parque natural por ser zona de refuxio de aves.

Véxase tamén

Ligazóns externas

• O río Serpis na Confederación Hidrográfica do Xúcar. (en castelán)