Pulp é unha banda de rock alternativo formada en Sheffield, Inglaterra en 1978 polo entón adolescente de 15 anos Jarvis Cocker. Foi orixinalmente coñecida como "Arabacus Pulp", pero o nome foi acurtado un ano despois. Os membros de Pulp eran todos compañeiros que asistían á City High School en Sheffield e acompañaron á banda Crude, da mesma escola, nos seus primeiros concertos. Citan como as súas influencias a David Bowie, The Cure, The Beatles e The Kinks.
Durante os anos 80 a banda esforzouse por conseguir o éxito, pero non sería ata os 90 cando gañarían prominencia no Reino Unido coa edición dos álbums His 'n' Hers en 1994 e particularmente Different Class en 1995, que acadou o número 1 na lista de álbums británica. Different Class conseguiu catro sinxelos top 10, incluídos "Common People" e "Sorted for E's & Wizz", que foron número 2 no seu país. O sexto álbum da banda, This Is Hardcore (1998), tamén debutou no número un no Reino Unido e foi nomeado ao MercuryPrize. No seu auxe, Pulp encabezaron o escenario Pyramid do Festival de Glastonbury dúas veces e foron considerados entre os "catro grandes" do Britpop, xunto con Blur, Oasis e Suede.[1][2]
O estilo musical de Pulp durante este período era un pop-rock influenciado pola música disco cunhas letras ultrarrealistas.
A banda lanzou We Love Life en 2001 e despois tomouse unha pausa dunha década, despois de vender máis de 10 millóns de discos.[3] Pulp reuniuse en 2011 para tocar en varios festivais e lanzaron "After You" en 2013, a súa primeira canción en 12 anos. A banda reuniuse por segunda vez en 2022 para unha nova xira e, máis tarde, lanzou o seu oitavo álbum, More, en xuño de 2025.
