Pacific League

Pacific League
Fundación	1949
Rexión	Xapón
Equipos	6
Actual campión	Orix Buffaloes (13º título)
Máis laureado	Seibu Lions (22 títulos)
Sitio web	npb.jp/pl

A Pacific League (パシフィック・リーグ, Pashifikku Rīgu) ou Liga do Pacífico, tamén coñecida como Pa League (パリーグ, Pa Rīgu), é unha das dúas ligas profesionais que constitúen a Nippon Professional Baseball, a máis importante competición de béisbol do Xapón. O gañador desta liga xoga anualmente contra campión da Central League nas Nippon Series para decidir o campión nacional. Actualmente está formada por seis equipos de todo o país, sendo o máis laureado os Seibu Lions. Ao contrario que na Central League, e do mesmo xeito que a Liga Americana da MLB, esta liga permite o uso de bateador designado.

Historia

A Liga do Pacífico foi fundada como Taiheiyo Baseball Union en 1949, nome que mantivo até 1980 cando adoptou a actual nomenclatura. O primeiro presidente desta liga foi Masaichi Nagata, propietario dos Daiei Stars. A competición comezou a súa andaina con sete equipos, catro procedentes da anterior Liga Xaponesa de Bésibol (Hankyu Braves, Nankai Hawks, Daiei Stars e Tokyu Flyers) e tres nos novos equipos (Kintetsu Pearls, Mainichi Orions e Nishitetsu Clippers). En 1954 entrou na liga un novo equipo, os Takahashi Unions, incrementando así o número até oito. A pesar de ser un equipo formado con xogadores cos que non contaban o resto de equipos da Liga, os Unions conseguiron unha series de segundos postos consecutivos até a fusión en 1957 cos Daiei Stars para formar os Daiei Unions, reducindo así de novo o número até sete equipos. Con todo, os novos Unions acabaron en último lugar na súa primeira temporada. Na seguinte temporada, fusionanse de novo, esta vez cos Mainichi Orions para formar os Daimai Orion. A liga ficaba así reducida a seis equipos, número que se mantén na actualidade.

Entre 1973 e 1982, a Liga do Pacífico tivo un formato de competición dividido en dúas partes, de forma que o campión da primeira parte se enfrontaba ao campión da segunda para determinar o posuidor do título de Liga. En 1975 a Liga comezou a utilizar a regra do bateador designado, seguindo así a estela da Liga Americana da Major League Baseball (MLB). Cando no ano 2005 se comezaron a xogar partidos entre equipos da Liga do Pacífico e da Liga Central, a regra do bateador designado é utlizada en función da liga na que compita o equipo local. Na temporada 2004 os Orix BlueWave e os Osaka Kintetsu Buffaloes fusionáronse para formar os Orix Buffaloes. Para manter os tradicionais seis equipos, entraron na liga os Tohoku Rakuten Golden Eagles. A partir desa mesma temporada foi introducido un sistema de eliminatorias (as Series de Campionato da Liga do Pacífico) para determinar o campión e participante nas Series do Xapón.

Equipos

	Equipo	Nome xaponés	Localización	Estadio	Patrocinador
	Chiba Lotte Marines	千葉ロッテマリーンズ Chiba Rotte Marīnzu	Chiba Chiba	ZOZO Marine Stadium 30.348 espectadores	Lotte
	Fukuoka SoftBank Hawks	福岡ソフトバンクホークス Fukuoka Sofutobanku Hōkusu	Fukuoka Fukuoka	Fukuoka Yahuoku! Dome 40.178 espectadores	SoftBank
	Hokkaido Nippon-Ham Fighters	北海道日本ハムファイターズ Hokkaidō Nippon-Hamu Faitāzu	Sapporo Hokkaido	Sapporo Dome 40.476 espectadores	Nippon Ham
	Orix Buffaloes	オリックス・バファローズ Orikkusu Bafarōzu	Osaca Osaca	Kyocera Dome Osaka 36.477 espectadores	Orix
	Saitama Seibu Lions	埼玉西武ライオンズ Saitama Seibu Raionzu	Tokorozawa Saitama	MetLife Dome 33.556 espectadores	Seibu
	Tohoku Rakuten Golden Eagles	東北楽天ゴールデンイーグルス Tōhoku Rakuten Gōruden Īgurusu	Sendai Miyagi	Estadio de Miyagi 30.508 espectadores	Rakuten

Estatísticas

Equipo	Campión	Subcampión	Terceiro
Saitama Seibu Lions	22	12	14
Fukuoka SoftBank Hawks	19	16	7
Orix Buffaloes	13	15	8
Hokkaido Nippon-Ham Fighters	7	8	15
Chiba Lotte Marines	5	8	14
Osaka Kintetsu Buffaloes	4	9	8
Tohoku Rakuten Golden Eagles	1	1	2
Daiei Unions	0	0	2
Takahashi Unions	0	0	0

Véxase tamén

Outros artigos

• Central League
• Nippon Professional Baseball

Ligazóns externas

• Páxina web oficial (en xaponés)