O violín de Sarasate
| O violín de Sarasate | |
|---|---|
| Autor/a | Alberto Fortes |
| Orixe | Galiza |
| Lingua | galego |
| Colección | colección Cómplice, nº 14 |
| Xénero(s) | Novela negra |
| Editorial | edicións do Cumio |
| Data de pub. | 2002 |
| Formato | rústica con lapelas 145 x 200 mm |
| Páxinas | 96 |
| ISBN | ISBN 978-84-8289-162-6 |
| [ editar datos en Wikidata ] | |
O violín de Sarasate. Un caso de Sherlock Holmes é unha novela policíaca escrita por Alberto Fortes, publicada en 2002 por Edicións do Cumio.
Trama[editar | editar a fonte]
En setembro de 1886 chegan a Pontevedra Sherlock Holmes e mailo seu acompañante o doutor John H. Watson, convidados pola Sociedade Recreo de Artesáns para impartir unha conferencia dentro dun ciclo sobre o crime, ao que tamén se convida, entre outros, a Auguste Dupin. Unha das principais razóns que levan a Holmes a aceptar facer a viaxe é que na vila do Lérez poderá asistir a un concerto do violinista Pablo Sarasate.
Pero o mesmo día da charla preséntaselle un caso de investigación: desapareceu o violín Stradivarius de 1724. Mediante o seu método de razoamento dedutivo, chega á conclusión de que o instrumento non foi sustraído, senón escondido dentro da habitación do violinista. Porén, queda algo amolado porque non chega a descubrir que quen o escondeu foi unha muller.
Narración[editar | editar a fonte]
A obra preséntase coma un relato escrito en primeira persoa polo propio doutor John H. Watson. O manuscrito estivo en posesión da súa familia até 100 anos despois de ser escrito, para evitar a súa publicación mentres quedase xente viva presente no relato. O texto foi enviado ao concello de Pontevedra pola familia do doutor Watson, que dispuxera que debía ser publicado nesa vila e despois en Londres. O concello remitiullo á "Sociedade Holmesiana de Pontevedra" (que estivo presidida, segundo o autor, por Marcial Gondar Portasany, Xosé Agrasar Muíños, Serxio Portela Campos, Alfonso Díaz Andrés, Ian Emmett e Fernando R. García Fernández), encargada da súa publicación, pero esta non se levou a cabo até o 2001 por unha dúbida respecto a cando debía ser editado.