Monte Apo

Monte Apo

(tl) Bundok Apo
Tipo	estratovolcán volcán durmido montaña
Situado na entidade xeográfica	Mindanao
Localización
Continente	Asia
División administrativa	Rexión de Davao, Filipinas e Davao del Sur, Filipinas
6°59′15″N 125°16′15″L
Cordilleira	Apo-Talomo
Características
Altitude	2.954 m
Prominencia topográfica	2.954 m
Illamento topográfico	905 km
Parque Patrimonial da ASEAN

O Apo localízase no sur de Filipinas

O Monte Apo é un estratovolcán e a montaña máis elevada das illas Filipinas cunha altura de 2.954 metros.

Nome

O seu nome significa "amo" ou "avó".

Situación

O Apo está situado ao sueste de Mindanao, a grande illa do arquipélago, na provincia de Cotobato, a poucos quilómetros ao suroeste da cidade de Davao. A cima presenta un cume aplanado, con tres picos, e un cráter de aproximadamente 500 metros de diámetro cun pequeno lago.

Erupcións

Aínda que o volcán é potencialmente activo, do que son signo as súas solfataras, descoñécese a data da súa derradeira erupción, e non se coñecen rexistros históricos que poidan documentar algún dato ao respecto. É aproveitado para xerar enerxía xeotermal.

Ascensións

Doadamente escalábel, o Apo foi ascendido, en subida rexistrada, por vez primeira o 10 de outubro de 1880 por Joaquín Rajal e outros acompañantes. Actualmente a cima do Monte Apo é un dos destinos preferidos polos filipinos. As sendas de subida están ben marcadas, aínda que presentan abundancia de lixo.

Contorno ambiental

O presidente Manuel L. Quezón declarou a área do Apo parque nacional o 9 de maio de 1936. Ten sido tamén proposto para as candidaturas de Patrimonio Mundial da UNESCO.

O monte está considerado como o centro de endemismos da illa de Mindanao. A súa área alberga arredor de 270 especies distintas de aves, das que un centenar se consideran endémicas. A respecto da flora, o monte acolle tres tipos diferentes de bosques tropicais, desde a base até media ladeira, con bosque de montaña na parte superior.