Lierse SK

Lierse SK
Nome	Koninklijke Lierse Sportkring
Fundación	6 de marzo de 1906
Desaparición	9 de maio de 2018
Estadio	Herman Vanderpoortenstadion
Inauguración	1925
Capacidade	14 538

O Koninklijke Lierse Sportkring, coñecido simplemente como Lierse, foi un club de fútbol belga da cidade de Lier, na provincia de Anveres. Gañou catro títulos da Primeira División e dúas Copas de Bélxica. O Lierse foi un dos seis clubs belgas que chegou a disputar a fase de grupos da Liga de Campións da UEFA.

Foi fundado en 1906 e debutou na Primeira División na tempada 1927/28. Foi un dos mellores equipos da primeira división ata o final da segunda guerra mundial, gañando dous títulos e rematando só catro veces fóra dos cinco primeiros. Ao final da tempada 1947/48 descendeu á segunda división. Mantívose en primeira entre 1953 e 1986, e de novo entre 1988 e 2007, gañando unha liga en cada un deses dous períodos. Xogou cinco anos máis na primeira división entre 2010 e 2015, militando logo na segunda categoría ata que en 2018 entrou en bancarrota e desapareceu.^[1]^[2]

O Lierse xogaba os seus partidos na casa no Herman Vanderpoortenstadion de Lier, tamén coñecido como Het Lisp, porque o estadio está situado nun barrio chamado Lisp. O equipo xogaba de amarelo e negro.

O maior símbolo da historia do club foi o dianteiro Bernard Voorhoof, xogador con máis partidos e goles coa camiseta do Lierse. Marcou 350 tantos en 529 encontros, e ademais vestiu 61 veces a camiseta da selección de Bélxica, todas mentres militaba no Lierse.

Historia

Os primeiros anos

En 1904, Gustaaf Van Den Roye coñeceu o fútbol en Anveres e quedou fascinado por el. Mercou un balón para xogar na súa cidade natal, Lier. Os primeiros partidos disputáronse nun terreo propiedade do graf Marnix de Sainte-Aldegonde. Os agricultores locais non estaban de acordo e tivo que intervir a policía, que prohibiu que se celebrasen máis partidos. O graf foi informado do sucedido e pediulle a Van Den Roye que fose velo. Cando Van Den Roye lle contou ao graf a súa intención de crear un club de fútbol e sinalou as dificultades coas que se enfrontaba, o graf prometeulle un terreo que podería servir de campo de fútbol.

O 6 de marzo de 1906, durante unha reunión nun pub local chamado De Roskam fundouse un club de fútbol, chamado Liersche Sportkring. Foi o nacemento do Lierse que tivo unha primeira xunta directiva formada por Gerard Quaeyhaegens como presidente, Gust van den Roye como secretario e Georges Peeters como tesoureiro. O graf Marnix de Sainte-Aldegonde aceptou converterse en presidente honorario.

Dous anos despois da súa fundación, en setembro de 1908, o Lierse converteuse en membro da Real Federación Belga de Fútbol, comezando a xogar no nivel máis baixo do fútbol belga. En 1913, o club obtivo o seu primeiro éxito no fútbol belga, cando se converteu no primeiro club dunha liga rexional en chegar aos cuartos de final da Copa de Bélxica. Foi ascendendo polas diferentes categorías do fútbol belga, ata que en 1922 logrou o ascenso ás divisións nacionais do fútbol belga, que xa nunca abandonaría ata a súa desaparición case un século despois.

1927–1948: Primeiras aparicións na máxima categoría

Cinco anos despois de acadar as divisións nacionais, en 1927, o Lierse proclamouse campión da Division 1, a segunda división do fútbol belga, cunha vantaxe de 2 puntos sobre o RSC Anderlecht, logrando así o ascenso á máxima categoría por primeira vez na súa historia. O equipo non tardou en destacar e en 1932 conquistou o seu primeiro título de liga. Nas 12 tempadas seguintes rematou só 1 vez fóra dos 5 primeiros, quedando subcampión en 1935 e 1939, e gañando dous novos campionatos en 1941 (torneo non oficial debido á segunda guerra mundial) e 1942.

Un dos principais factores do éxito do club neste período foi o dianteiro Bernard Voorhoof, que marcou 350 goles en 529 partidos co club. Foi elixido "xogador do século do Lierse" cando o club celebrou o seu 100º aniversario en 2006.

A segunda guerra mundial tivo un forte impacto no club. Dous dos seus xogadores, o porteiro internacional Frans Christiaens e Frans Vervoort morreron durante os bombardeos aliados nunha fábrica de Mortsel, ocupada por Alemaña. Tamén Jules Van Craen, máximo goleador da liga belga na tempada 1942/43 morreu durante a guerra. Na tempada 1944/45 o Lierse, ao igual que outros clubs da zona, non competiu na liga, debido aos bombardeos alemáns sobre porto de Anveres. Estes feitos, sumados á retirada dalgúns dos xogadores de máis idade, provocaron que o club fose decaendo ata que en 1948 rematou último na liga. Despois de 21 anos na máxima categoría, o Lierse descendeu por primeira vez na súa historia.

1953–2018

O club regresou á primeira división en 1953. En 1960 gañou o seu terceiro título de liga e ese mesmo ano debutou na Copa de Europa nun partido contra o FC Barcelona de Luis Suárez e Kubala. En 1969 gañou a súa primeira Copa de Bélxica.

O 21 de setembro de 1971 pasou á historia como un dos días máis importantes da historia do club, ao golear por 0-4 a domicilio ao Leeds United na volta da primeira rolda da Copa da UEFA, remontando o 0-2 que lograra na ida o equipo inglés, vixente campión do torneo.

En 1986 descendeu de novo, regresando a primeira en 1988. En 1997 gañou un novo título de liga, case catro décadas despois do anterior, ao superar por dous puntos ao Club Brugge. Dous anos despois conquistou a súa segunda Copa belga.

O Lierse foi comprado en 2007 polo empresario exipcio Maged Samy, dono tamén dos clubs exipcios KV Turnhout e Wadi Degla. En 2018 o club declarouse en bancarrota e tras fracasar as negociacións para unha posible venda, acabou por desaparecer.

Trala desaparición do club formouse o Lierse Kempenzonen, que xoga co mesmo escudo que o antigo Lierse SK e disputa os seus partidos tamén no Herman Vanderpoortenstadion.^[3] Tamén en 2018, o xa existente K. Lyra mudou o seu nome a K. Lyra-Lierse Berlaar, considerándose tamén herdeiro do desaparecido club.^[4]

Estadio

Desde 1925 o Lierse xogou no Herman Vanderpoortenstadion, a miúdo chamado Lisp. O estadio conta con capacidade para 14.538 seareiros.^[5]

Adestradores

Gyula "Jules" Turnauer (1930–36) Bill Berry (1 de xullo de 1946 - 30 de xuño de 1948) Keith Spurgeon (1970) Frans de Munck (1971) János Bédl (1 de xullo de 1972 - 30 de xuño de 1973) Hans Croon (1974–75) János Bédl (1 de xullo de 1975 - 30 de xuño de 1977) Gustaaf Vandenbergh (1977–79) Ernst Künnecke (1979–81) János Bédl (1 de xullo de 1981 – 30 de xuño de 1982) Hans Croon (1982–83) Johan Boskamp (1984–87) Walter Meeuws (1 de xullo de 1987 – 1 de marzo de 1988) Dimitri Davidović (1 de xullo de 1988 – 30 de xuño de 1989) Barry Hulshoff (1989–91) Herman Helleputte (1991–94) Eric Gerets (1 de xullo de 1994 – 30 de xuño de 1997) Jos Daerden (1 de xullo de 1997 - 1 de xullo de 1998) Walter Meeuws (1 de xullo de 1998 – 30 de xuño de 2001) Regi Van Acker (2001–02)	Emilio Ferrera (1 de xullo de 2002 - 18 de maio de 2004) Paul Put (1 de xullo de 2004 – 2 de novembro de 2005) Eric van Meir (interino) (novembro de 2005) René Trost (7 de novembro de 2005 – 13 de novembro de 2006) Kjetil Rekdal (22 de novembro de 2006 – 25 de xuño de 2007) Herman Helleputte (1 de xullo de 2007 – 18 de febreiro de 2010) Aime Anthuenis (21 de febreiro de 2010 – 19 de setembro de 2010) Eric Van Meir (19 de setembro de 2010 - 3 de xaneiro de 2011) Trond Sollied (3 de xaneiro de 2011 – 30 de xuño de 2011) Chris Janssens (1 de xullo de 2011 – 12 de novembro de 2012) Herman Vermeulen (interino) (1 de novembro de 2012 – 12 de novembro de 2012) Hany Ramzy (novembro 2012-13) Stanley Menzo (1 de xullo de 2013 – 31 de agosto de 2014) Slaviša Stojanovič (5 de setembro de 2014 – 28 de xaneiro de 2015) Herman Helleputte (28 de xaneiro de 2015 – 30 de xaneiro de 2015) Olivier Guillou (30 de xaneiro de 2015 - 31 de maio de 2015) Younes Zerdouk (10 de xuño de 2015 – 14 de setembro de 2015) Eric Van Meir (setembro de 2015 – 15 de marzo de 2017) Frederik Vanderbiest (16 de marzo de 2017 - 6 de outubro de 2017) William Still xunto con David Colpaert (7 de outubro de 2017 -actual)