Iuri Levitán

Iuri Borísovich Levitán

Nome orixinal	(ru) Юрий Борисович Левитан
Biografía
Nacemento	2 de outubro de 1914 Vladímir, Rusia
Morte	4 de agosto de 1983 (68 anos) Prókhorovka, Rusia
Lugar de sepultura	cemiterio Novodevichii
Actividade
Ocupación	Locutor de radio
Partido político	Partido Comunista da Unión Soviética
Carreira militar
Conflito	Fronte Oriental (segunda guerra mundial)
Premios
Medalla da vitoria sobre Alemaña na gran guerra patriótica 1941-1945  Medalla Conmemorativa polo Centenario do Natalicio de Lenin  Artista de Honor da RSFSR  Artista do Povo da RSFSR (pt)  Medalla Conmemorativa do 20º Aniversario da Vitoria na Gran Guerra Patria de 1941-1945  Medalla do 50° Aniversario das Forzas Armadas da Unión Soviética  Medalla Conmemorativa do 30º Aniversario da Vitoria na Gran Guerra Patria de 1941-1945  Medalla do 60º Aniversario das Forzas Armadas da Unión Soviética  Medalla polo Traballo Valente na Gran Guerra Patria 1941-1945  Medalha "Pela Defesa de Moscou" (pt)  Orde da Revolución de Outubro  Medalla ao Traballador Veterano  Orde da Insignia de Honra  Bandeira Vermella do Traballo  Artista do Povo da URSS (pt)  Medalla Conmemorativa do 800º Aniversario de Moscova
Descrito pola fonte	Grande Enciclopedia Soviética 1969-1978, (sec:Левитан Юрий Борисович) Moskovskaia entsiklopedia: Litsa Moskvi

Iuri Borísovich Levitán (en ruso: Ю́рий Бори́сович Левита́н), nado o 2 de outubro de 1914 e finado o 4 de agosto de 1983, foi un locutor de radio soviético, célebre polos seu partes de guerra en Radio Moscova, que adoitaba comezar dicindo: "Atención, fala Moscova!" (ruso: Внимание, говорит Москва!). A súa profunda voz anunciou vitorias en batalla, avisos de bombardeo, e a rendición de Alemaña á Unión Soviética o 9 de maio de 1945. Tamén foi quen fixo pública a primeira información da morte de Stalin, e da primeira viaxe tripulada ao espazo. A súa voz era inmediatamente recoñecida polo público soviético.

Levitán era xudeu, e naceu en Vladímir, Rusia; o seu pai, Boris Levitán, era xastre, e a súa mai, María, era ama de casa. Levitán chegou a Moscova procurando unha carreira artística como actor, pero os seus fracasos levárono a se conformar cun posto de locutor. O seu fabuloso ton de voz era unha excelente baza, pero foi contratado coa condición de se desfacer do seu forte acento de Vladímir. Foi o mesmo Stalin quen recoñeceu o valor nos medios de Levitán, esixindo persoalmente ás autoridades da radio soviética o seu ascenso a locutor principal.

Ao dar comezo a segunda guerra mundial en Rusia, Levitán foi evacuado a Sverdlovsk no outono de 1941 xunto coa emisora, que foi desmontada e trasladada ao leste para poder seguir emitindo lonxe da fronte. Naquel tempo o paradeiro de Levitán era un segredo de Estado, debido á súa importancia como a máis destacada personalidade da radio soviética. Os militares do Exército Vermello adoitaban dicir que a voz de Levitán tiña a forza dunha división enteira. Para o Terceiro Reich, Levitán era o inimigo número 1, mesmo por diante de Stalin, e había unha recompensa de 250.000 marcos pola súa cabeza.

Tras a guerra informou de eventos na Praza Vermella e anunciaba proclamacións estatais. Entre 1978 e 1983 anunciou o solemne "Minuto de Silencio" anual para conmemorar a vitoria na Grande Guerra Patriótica. En 1980 foille outorgado o título de Artista do Pobo da URRS. Faleceu en 1983 en Prókhorovka, durante as cerimonias do aniversario da Batalla de Kursk. Está enterrado no famoso cemiterio de Novodevichy, en Moscova.