Gripe de 1918

Na Galipedia, a Wikipedia en galego.

Coñécese como gripe de 1918 unha pandemia de gripe que afectou a todo o planeta precisamente cando remataba a Primeira Guerra Mundial e matou a 50 millóns de persoas, un número tres veces maior que o de baixas na guerra.

Historia e características[editar | editar a fonte]

Ignórase onde apareceu o virus, pero as primeiras noticias sobre a súa intensidade publicáronse en xornais españois, polo que tamén se coñece como gripe española. A razón é que España non participaba na guerra e, polo tanto, non existía censura previa. De certo, entón descoñecíase que a gripe puidese ser provocada por un virus.

Con efecto, na primavera e comezos do verán de 1918, a enfermidade estendeuse por ambos os dous lados dos frentes europeos, afectando a divisións enteiras. Declinou unhas semanas e logo, a finais do verán, rexurdiu moi violentamente. Os doentes sentían febre, dor de cabeza e dores nas articulacións. Curiosamente, moitos eran novos, a quen a gripe apenas afecta. Un 5% das vítimas morreron, algunhas en só dous ou tres días. Os seus pulmóns revelábanse nas autopsias completamente anegados de sangue; os rostros dos mortos tornábanse de cor violeta.

A epidemia afectou aos campamentos militares de Europa e os Estados Unidos e pasou logo ás cidades portuarias e industriais, matando a miles de persoas cada día e estendéndose finalmente por todo o planeta. Estímase que todos os seres humanos respiraron o virus e que a metade enfermaron.

No século XX houbo outras pandemias de gripe en 1957 e 1968 e a gripe aviaria.

Un artigo publicado na edición dixital da revista "The New England Journal of Medicine", o 16 de xullo de 2009, The Persistent Legacy of the 1918 Influenza Virus (de David M. Morens, M.D., Jeffery K. Taubenberger, M.D., Ph.D., and Anthony S. Fauci, M.D.) estableceu que o virus gripal de 1918 deu lugar a unha cepa resistente da cal o virus A/H1N1 do 2009 e herdeira.

Véxase tamén[editar | editar a fonte]

Bibliografía[editar | editar a fonte]

  • David M. Morens, M.D., Jeffery K. Taubenberger, M.D., Ph.D., and Anthony S. Fauci, M.D., "The Persistent Legacy of the 1918 Influenza Virus", Edición dixital do The New England Journal of Medicine, 16 de xullo de 2009, http://content.nejm.org/cgi/content/full/NEJMp0904819.