Fractura umeral proximal
Para outro tipo de fractura no úmero: Fractura umeral
A fractura umeral proximal é unha fractura da parte proximal do óso úmero. Son adoito frecuentes, sobre todo en doentes de avanzada idade, e constitúen arredor dun 5% do total das fracturas no adulto. É unha fractura típica de mulleres de máis de 60 anos afectas de osteoporose. Os síntomas e signos típicos desta fractura son o a dor, a postura antiálxica, e a impotencia funcional do ombreiro. Ás veces pode aparecer un hematoma na cara interna do brazo e na parte lateral do tórax, denominado hematoma de Hennequin, o cal non reviste maior importancia. Tamén pode resultar afecto o nervio axilar. No estudo deste tipo de fracturas emprégase a clasificación de Neer. Esta clasificación distingue entre fracturas non desprazadas ou cun desprazamento de menos de 1 cm (tipo I); fracturas con desprazamento do colo anatómico do úmero (tipo II); fracturas con desprazamento maior de 1 cm e angulación do colo de máis de 45º (tipo III); as fracturas do troquíter (tipo IV), que poden ter dous fragmentos (IVa), tres fragmentos (IVb) ou máis de tres, existindo necrose avascular (IVc); fracturas do troquino con desprazamento de máis de 1 cm (tipo V), podenso dividirse á súa vez en dous fragmentos (Va), tres (Vb) ou catro (Vc); e fracturas acompañadas de luxación e lesións de partes brandas, calcificacións periarticulares e fibrose (tipo VI). O obxectivo do tratamento e restaurar a función da articulación, así como eliminar a dor. O tratamento pode ser conservador, por osteosínteses, ou por medio de artroplastia (próteses).