Roque Cameselle

Roque Cameselle

A. Roque Cameselle Capón, nado en Vigo en 1981, é un escritor e director de cinema galego.

Traxectoria

Vive en Tui desde neno. Licenciado en Comunicación Audiovisual, foi profesor durante cinco anos de guión cinematográfico na Escola Superior de Cine de Galicia, e Crítico de cine de Faro de Vigo. Dirixiu as curtametraxes Memoria indesexable (1998), A moza do último (1998), Soldado sen fortuna (2001) e Amor a Mantis (2003).

No 2011 estreou no Festival Internacional del Nuevo Cine Latinoamericano de La Habana unha película de animación titulada The little Wizard. O mago Dubidoso, que significou o seu debut como director de longametraxes. A obra está baseada nos primeiros capítulos da súa novela Bieito Dubidoso.

Na actualidade, traballa como director e xefe de guionistas no desenvolvemento dunha serie de televisión de debuxos animados que se chama O diario de Berto.

Como guionista escribiu Na luz freada da tarde (2001), A Gilda chamábanlle Leonor (2002) e Meu xeneral o asasino foi o mar (2003), traballos premiados na convocatoria da Xunta de Galicia para a escritura de guións.

Como narrador publicou o libro de relatos O Pausiñas (2001), e a novela Bieito Dubidoso (2003). Algúns dos seus relatos foron publicados en volumes colectivos. Dende 1997 obtivo varios premios literarios no eido da poesía, do relato e da novela curta.

Obras

Narrativa

• O Pausiñas, 2001, Galaxia.
• Bieito Dubidoso, 2003, Xerais.

Obras colectivas

• Ata que malle en min o mencer, 1998.
• IIº Certame de relatos curtos Os Viaductos, 2001.
• A memoria de Tui, 2002, Xerais. Con Carlos Díaz Martínez.
• Nun edificio e catro contos máis, 2002.
• Alma de beiramar, 2003, Asociación de Escritores en Lingua Galega.

Filmografía como director e guionista

• Memoria Indesexable, Curtametraxe - 1998.
• A moza do último, Curtametraxe - 1999.
• Soldado sen fortuna, Curtametraxe - 2001.
• Amor a Mantis, Curtametraxe - 2003.
• O diario de Berto, Capitulo Piloto - 2008.
• O pequeno mago, Longametraxe - 2013.

Véxase tamén

Ligazóns externas

• Ficha do autor en Xerais
• Ficha do autor na AELG