É unha especie de 15–16cm de lonxitude, peso de 25 gramos e envergadura de 22–26cm. Lombo, cola e parte superior da cabeza son pardos, namentres a parte inferior do corpo, gorxa e fazulas son amarelos. Salientar a careta característica dos machos da especie, cunha liña ocular negra. As femias e os xoves non presentan este deseño facial e teñen cores máis esluídos.
Ave frecuente nas zonas con matogueiras ou con cultivos. No sur da súa área de distribución é frecuente en bosques de aciñeiras e nas viñeiras. Aliméntase de insectos e sementes. Acostuma cantar dende lugares elevados ou prominentes
O período de cría vai de maio a xullo, podendo facer dúas postas no ano. O niño adoita estar preto do chan. Cada posta consta entre 3 e 5 ovos, cun tempo de incubación de 13 días. Os polos permanecen no niño entre 10 e 13 días trala eclosión.
Presente todo o ano no Norte e Sur da Península Ibérica, Oeste e Sur de Francia, nos Balcáns e nas zonas litorais de Marrocos, Alxeria e Turquía. Presente na cría ou de maneira esporádica no leste de Francia e Interior de Turquía.
"100 aves comúns do concello de O Grove e áreas veciñas". C.D. Romay Cousido, Antonio Fontoira García, Emilio Martínez Sabarís, Atocha Ramos Martínez. Editado polo Concello do Grove. Depósito Legal:C 2423-2009
Guía de Aves: España, Europa y Región Mediterránea. Lars Svensson, Killian Mullarney, Dan Zetterstïons. Ediciones Omega. (en castelán)
