Ecoespazo do Rexo

Na Galipedia, a Wikipedia en galego.
Saltar ata a navegación Saltar á procura
Vista xeral

Localizado na parroquia de Requeixo de Valverde (Allariz), o Ecoespazo do Rexo é un proxecto pioneiro de recuperación de zonas rurais, patrocinado pola Fundación Ramón González Ferreiro e o Concello de Allariz.

Busca o obxectivo da demostra-la posibilidade de recuperación económica e social do medio rural, evitando a súa despoboación mediante a construción de instalacións gandeiras, industriais, educativas e culturais propias da zona, e todo iso baseado no aproveitamento integral de enerxías renovables compatible co gozo dun espazo natural.

O Ecoespazo do Rexo consta dunha explotación de ovellas que inclúe granxa escola e fábrica de queixo (a Escola silvo-pastoril do Rexo), un Centro de Educación Ambiental, unha minicentral hidroeléctrica e unha intervención artística sobre rochas e árbores, todo á beira do río Arnoia, unha vez recuperado.

Para visitalo hai que saír de Allariz pola estrada a Xunqueira de Ambía e toma-la saída a Requeixo de Valverde, seguindo os indicadores. Tras pasar Vilaboa e o propio Valverde, débese coller unha desviación á esquerda (mal sinalizada) que nos leva directamente ó lugar. O acceso é libre e gratuíto.

A pegada de Ibarrola[editar | editar a fonte]

Agustín Ibarrola en Celorio.

O elemento máis característico deste ecoespazo é a intervención escultórica e pictórica do escultor vasco Agustín Ibarrola (Basauri, Biscaia, n. 1930), que xa realizara obras semellantes no Bosque de Oma, cerca de Gernika, ou o "Bosque Encantado", na beira do río Tormes (Salamanca). Consiste nunha exposición ó aire libre de rochas de granito e lousa de formas e tamaños diversos, distribuídas irregularmente e pintadas con motivos xeométricos e naturais. A intervención inclúe tamén pinturas sobre os troncos e ramas principais dalgunhas árbores.

Para a súa realización utilizáronse materiais recuperados das canteiras galegas (unhas 600 toneladas de pedra), pintura biodregradable e enerxías renovables. Colaboraron na súa construción membros do taller de divulgación vigués "Renovart los espacios" [1] e alumnos das facultades de Belas Artes españolas.

A intervención foi inaugurada en 1999. A intención do artista foi transforma-lo medio mediante a harmonización da pedra, terra e auga, elementos habituais e presentes na cultura galega de tódolos tempos, decorados con motivos de raíz celta, segundo o autor, que quedan así integrados nun mesmo espazo xeográfico. Buscaba, di o autor, crear un espazo natural que respecte tanto a natureza como a tradición e a historia de Galicia, propósito que influíu na elección da data de inauguración, na noite de San Xoán.

Ibarrola calificouno como "la obra más importante de mi vida" e engadíu que "He puesto en O Rexo todo lo que sabía e incluso lo que no sabía".

Outros elementos do Ecoespazo[editar | editar a fonte]

Pódese visitar tamén unha granxa de 250 ovellas de raza lacha, de aptitude leiteira, na que se elabora queixo co seu leite. Nesta granza escola impártense cursos de especialización gandeira e cultivos pratenses.

Tamén unha minicentral hidroeléctrica, de 430 kw, contruída sobre un vello muíño hidráulico.

E, finalmente, un Centro de Educación Ambiental construído mediante técnicas bioclimáticas.

Todo o conxunto utiliza enerxía solar e a obtida de biomasa.

Galería de imaxes[editar | editar a fonte]

Ligazóns externas[editar | editar a fonte]