NUMAX
| NUMAX | |
|---|---|
  | |
| Tipo | Cooperativa |
| Fundación | 2015 |
| Produtos | Cinema Libraría Distribuidora Laboratorio de deseño |
| Na rede | |
| https://numax.org | |
    | |
| [ editar datos en Wikidata ] | |
NUMAX é unha cooperativa galega de traballo asociado sen ánimo de lucro situada en Santiago de Compostela. Posúe unha sala de cinema, unha libraría (física e online) e un laboratorio de deseño gráfico[1] e de vídeo. Actuou tamén como distribuidora de cinema entre 2015 e 2018.[2].
Características[editar | editar a fonte]
Abriu as súas portas en marzo de 2015 na rúa Concepción Arenal de Santiago de Compostela, onde se atopan arestora o cinema e a libraría. A programación cinematográfica combina a estrea de filmes independentes e de autor, coa reposición de cinema clásico e de repertorio. Dedica unha parte da súa programación ao público mozo a través dos programas estables Petís NUMAX e NUMAX na Escola. As proxeccións de NUMAX son sempre en versión orixinal subtitulada e, desde 2016, forma parte da rede de salas independentes Europa Cinemas. A libraría traballa desde o ano 2020 baixo o selo Librarías de Calidade que outorga Acción Cultural Española e a Asociación de Cámaras do Libro de España. É habitual, tanto na sala de cinema como na libraría, a visita de autores e autoras de prestixio nacional e internacional presentar ante o público as súas creacións. Entre outras, pasaron por NUMAX: Aki Kaurismäki, Albert Serra, Pedro Costa, José Luis Guerín, Rita Azevedo, Nobuhiro Suwa, Ana Pfaff, Alberto Vázquez, Charles Burnett ou Jean-Gabriel Périot.
O nome da cooperativa ten orixe no filme Numax presenta... (1980), de Joaquim Jordà, que recollía o conflito laboral nunha empresa de electrodomésticos chamada Númax, que rematou coa autoxestión da factoría por parte do cadro de persoal.
Alén dos ingresos percibidos pola venda directa e a prestación de servizos, NUMAX conta con diferentes modalidades de abonos (reducido, xeral, colabora, protexe) de maneira que as persoas abonadas obteñen descontos e outras vantaxes en troques dunha cota anual coa que apoian a estrutura da cooperativa.
As persoas socias da cooperativa son Adrián Pardellas, Antonio Doñate, Avelino González, Marcos Flórez, Mariña de Toro, Olalla Cociña, Pablo Cayuela, Xan Gómez Viñas, Xosé Carlos Hidalgo, Iria Silvosa, Clara García Nieto e María Villamarín. Margarita Ledo é socia colaboradora da cooperativa. Irma Amado e Ramiro Ledo foron socias da cooperativa desde a súa fundación, en 2014, até inicios de 2021.
NUMAX ten recibido diferentes premios e recoñecementos ao seu traballo, entre eles o Premio José Sellier no marco dos Premios Mestre Mateo 2015, o Premio Cultura Galega de Creación Audiovisual[3] en 2016 e o Premio da Deputación da Coruña á mellor iniciativa empresarial xeradora de emprego en 2019. En 2023, a Libraría NUMAX recibiu un dos galardóns honoríficos na Gala dos Premios Follas Novas do Libro Galego por "representar todo o que se pode esperar dunha libraría, con inquedanzas, curiosidade intelectual, actividades e que integra nun espazo único unha oferta cultural que leva de man cine e libros".
Notas[editar | editar a fonte]
- ↑ Presentación na páxina web da cooperativa.
- ↑ "NUMAX Distribución". distribucion.numax.org. Arquivado dende o orixinal o 22 de marzo de 2018. Consultado o 2018-03-21.
- ↑ Premios da Cultura Galega 2016.