Contido libre

Na Galipedia, a Wikipedia en galego.

O contido libre ou información libre é un concepto que abarca calquera obra funcional, de arte ou outro contido creativo que non posúe restricións legais significativas en relación co dereito de uso, a redistribución e a creación de versións modificadas ou derivadas por parte de terceiros.[1]

O contido libre abarca todas as obras no dominio público e aquelas que teñen dereitos de autor pero que están suxeitas a unha licenza que outorga e protexe as liberdades mencionadas. Dado que, por omisión, a lei outorga aos propietarios de dereitos un control total sobre as súas creacións (todos os dereitos reservados), é necesario declarar de forma explícita que unha obra é libre, xeralmente por medio da referencia ou inclusión de cláusulas de licenza que acompañan a obra.

Con todo, se os dereitos de autor expiraron, unha obra que estea no dominio público pode en certos casos deixar novamente de ser libre, e a consecuencia as obras derivadas tamén deixarán de selo, se a lei de dereitos cambia.[2]

Cultura libre[editar | editar a fonte]

A cultura libre é unha corrente de pensamento que promove a liberdade na distribución e modificación de traballos creativos baseándose no principio do contido libre para distribuír ou modificar traballos e obras creativas, usando Internet así como outros medios. A cultura libre está conformada por catro diferentes tipos de correntes ou pensamentos: O dominio público, o copyleft, as licenzas Creative Commons e as licenzas de programas libres (software libre). As obras en dominio público poden utilizar tamén formatos libres.

Dominio público[editar | editar a fonte]

Dende fai máis de 100 milenios a humanidade viviu en liberdade e deixou plasmadas moitas obras culturais as cales careceron de dereitos de autor, polo que puideron ser estudadas e copiadas ou reproducidas por calquera outra persoa.

Dende hai tres séculos creouse o dereito de autor, ou a propiedade intelectual, a cal dá dereitos a un autor sobre as obras que creou. Unha obra en dominio público tamén pode ser aquela cuxo autor abandonou e da que xa non ten control sobre a distribución e uso. Desta maneira, calquera outra persoa pode manipular, distribuír e utilizar o traballo sen consecuencias legais. Un traballo liberado no dominio público polo seu autor é material libre.

Creative Commons[editar | editar a fonte]

Creative Commons é un grupo de licenzas que permiten compartir traballos en forma aberta ou gratuíta baixo varias condicións. O seu sitio web foi creado por Lawrence Lessig, nel pódese atopar unha listaxe de licenzas que nos permiten compartir baixo varias condicións. Tamén ofrece unha procura en liña de varios proxectos de Creative Commons.

Dereito de autor[editar | editar a fonte]

Desde os inicios da humanidade a cultura foi libre, non foi até fai tres séculos cando se iniciou o concepto de dereitos de autor. Tradicionalmente, o dereito ou os dereitos de autor (en inglés copyright, traducido literalmente como «dereito de copia») é un concepto legal que outorga ó autor ou creador dunha obra os dereitos legais para controlar a distribución e exhibición do seu traballo.

O dereito de autor adoita ter unha vixencia limitada dependendo do país de publicación, a cal oscila entre 5 e 7 décadas, un período de tempo despois do cal o traballo pasa ó dominio público. Durante a vixencia dos dereitos, as obras só poden ser distribuídas, exhibidas ou modificadas co permiso do autor, xeralmente a través dunha licenza ou permiso.

A maioría de obras publicadas antes de 1940 atópanse hoxe en día baixo o dominio público. Moitos autores de obras de finais do século XX e principios do século XXI decidiron publicar as súas obras en dominio público ou con licenzas copyleft ou Creative Commons en lugar de publicalas con dereitos reservados.

A cultura libre e as obras baixo licenzas Creative Commons oponse ás medidas restritivas das leis de dereitos de autor, que varios membros do movemento alegan que tamén obstaculizan a creatividade. Os usos tradicionais do dereito de autor son restritivos en varias formas. Limitan a distribución do traballo a aqueles que poden ou están dispostos a pagar as regalías ó autor polo uso do contido. Ademais, crea unha barreira perceptual entre os autores, o que limita as modificacións do traballo, como en collages e contido colaborativo.

Notas[editar | editar a fonte]

  1. Stallman, Richard (20 de marzo de 2008).
  2. Nate Anderson (16 de xullo de 2008).

Véxase tamén[editar | editar a fonte]

Outros artigos[editar | editar a fonte]

Ligazóns externas[editar | editar a fonte]