Concello de Aneby
| |||||
| Localización | |||||
|---|---|---|---|---|---|
| |||||
| Estado | Suecia | ||||
| Condado | condado de Jönköping  | ||||
| Capital | Aneby (en)  | ||||
| Poboación | |||||
| Poboación | 6.805 (2025) (12,29 hab./km²) | ||||
| Xeografía | |||||
| Parte de | |||||
| Superficie | 553,9 km² | ||||
| Altitude | 204 m | ||||
| Comparte fronteira con | |||||
| Datos históricos | |||||
| Precedido por | |||||
| Creación | 1 de xaneiro de 1971: (Reforma municipal sueca de 1971) | ||||
| Organización política | |||||
| Membro de | |||||
| Sitio web | aneby.se | ||||
    | |||||
Aneby é un municipio sueco (kommun) do condado de Jönköping.[1] A súa capital é Aneby. En decembro do ano 2024 o concello tiña unha poboación de 6 797 habitantes.[2]
O municipio está formado por vales que se entrecruzan con elevacións medias, a meirande parte delas cubertas por bosques de coníferas. As condicións xeográficas afectaron á economía do municipio, sendo dominante a industria da madeira aínda a que a súa importancia diminuíu.
A poboación medrou ata a metade dos anos 90 do século pasado, cando a tendencia se inverteu. Porén, a mediados da década de 2010 volveu subir o número de habitantes do municipio.
Historia administrativa
[editar | editar a fonte]A área do concello correspóndese coa das parroquias de Askeryd, Bredestad, Bälaryd, Frinnaryd, Haurida, Lommaryd, Marbäck e Vireda. Coa reforma municipal de 1862 formáronse nesas parroquias concellos rurais co mesmo nome.
Na zona atopábase tamén a localidade municipal de Aneby, establecida o 24 de novembro de 1923 e disolta a finais de 1966.
Coa reforma municipal de 1952 creáronse dous grandes concellos na zona: Bredestad (a partir dos anteriores concellos rurais de Askeryd, Bredestad, Bälaryd, Frinnaryd e Marbäck), e Hullaryd (a partir dos de Haurida, Lommaryd e Vireda).
En 1967 creouse o concello rural de Aneby a partir dos municipios de Bredestad e Hullaryd. O actual concello de Aneby naceu coa reforma municipal de 1971 pola reorganización co concello rural de Aneby.[3]
Xeografía
[editar | editar a fonte]O concello de Aneby atópase no nordés do condado de Jönköping. Ao norte limita co municipio de Tranås, ao oeste co de Jönköping, ao sur co de Nässjö, e ao sueste co de Eksjö, todos eles no condado de Jönköping. Ao leste fai fronteira co concello de Ydre, no condado de Östergötland.
Hidrografía e topografía
[editar | editar a fonte]A paisaxe está formada por vales que se cruzan con alturas intermedias, algunhas en forma de longos drumlins. O fondo dos vales atópase a uns 200 metros sobre o nivel do mar e as alturas alcanzan os 300 metros, sendo nalgúns casos máis altas. O río Svartån flúe dende o sur ata o norte a través dunha das liñas de fractura e entre os lagos Anebysjön e Ralången pasa a fervenza Stalpet, de 19 metros de altura. A meirande parte da paisaxe está cuberta de bosque, especialmente de coníferas. As terras de cultivo atópanse nas zonas altas onde a terra é de gran máis fino e o risco de xeadas é menor. Alí atópanse as granxas soas ou en fila unha tras outra. A terra cultivable está máis preto da súa granxa correspondente, mentres que os pastos e o bosque están máis abaixo na ladeira.[4]
Conservación da natureza
[editar | editar a fonte]No ano 2022 había seis reservas naturais no concello de Aneby.[5] O lago Ören está clasificado como unha área Natura 2000 e na súa ribeira occidental atópase a reserva natural de Björkenäs. A zona é rica en carballos e ten unha variada paisaxe agrícola. Existen moitas árbores vellas e nodosas.[6] O bosque caducifolio de Degla está situado xunto ao lago Noen e consta de bosque caducifolio, bosque pantanoso caducifolio e zona húmida. Na reserva natural prosperan moitas especies de paxaros e doutros animais.[7] Nos anos 60 fundouse o que hoxe é unha das reservas máis pequenas e antigas do condado, Vållingsön. Situada no lago Ören é unha illa importante como punto de nidificación para especies de paxaros como movellas árticas, mergullóns cristados, biluricos bailóns, carráns comúns e aguias peixeiras.[8] As outras reservas son Hyllingen, Nynäs e Åsen.[5]
Divisións administrativas
[editar | editar a fonte]Ata o ano 2016 para cuestións de informes de poboación o concello de Aneby vestaba dividido en cinco congregacións: Aneby, Askeryd, Frinnaryd, Haurida-Vireda e Lommaryd.
A partir de 2016 o municipio está dividido no seu lugar en oito distritos que se corresponden coas antigas parroquias: Askeryd, Bredestad, Bälaryd, Frinnaryd, Haurida, Lommaryd, Marbäck e Vireda.[9]
Notas
[editar | editar a fonte]- ↑ "Län och kommuner i kodnummerordning". Statistiska centralbyrån. 2017-05-05. Archived from the original on 05 de maio de 2017. Consultado o 2022-08-06.
- ↑ "Folkmängd och befolkningsförändringar - Kvartal 4, 2024". Statistikmyndigheten SCB (en sueco). Consultado o 2025-03-05.
- ↑ Andersson, Per (1993). Sveriges kommunindelning 1863-1993. Mjölby: Bokförlaget Draking. ISBN 978-91-87784-05-7.
- ↑ "Aneby - Uppslagsverk - NE.se". www.ne.se. Consultado o 2022-08-15.
- ↑ 5,0 5,1 "Naturreservat". www.lansstyrelsen.se (en sueco). Consultado o 2022-08-15.
- ↑ "Björkenäs". www.lansstyrelsen.se (en sueco). Consultado o 2022-08-15.
- ↑ "Degla lövskog". www.lansstyrelsen.se (en sueco). Consultado o 2022-08-15.
- ↑ "Vållingsön". www.lansstyrelsen.se (en sueco). Consultado o 2022-08-15.
- ↑ "Förordning om distrikt (SFS 2015:493)" (PDF). Regeringskansliet. Consultado o 15 de marzo de 2025.
