O Club do Mar Bueu é un club deportivo galego que participa en regatas de todas as categorías e modalidades de banco fixo, bateis, traiñeiriñas e traiñeiras dende a súa fundación en 1982. Dende 2024 compite na Liga ACT.
O club foi fundado en 1982 da man de Manuel Otero Pérez.[1] Na primeira década da súa existencia conseguiu os seus primeiros logros, clasificándose para o Campionato de España de Bateis en 1987 e gañando en 1989 a primeira bandeira de traiñeiras da historia do club, a Bandeira Concello de Bueu.[2] Despois das dificultades da década de 1990, o club viviu un rexurdir nos últimos anos do século, co pulo da canteira e das categorías femininas. En 2023, a traiñeira do club, a Maruxía, fixo historia ao rematar subcampioa da Liga Galega de Traiñeiras, por detrás de Ares,[3] e máis tarde conseguir o ascenso á Liga ACT nos play-offs xunto a San Pedro.[4]
