Código internacional de navegación marítima

Comunicación naval

O código internacional de navegación marítima utiliza bandeiras para transmitir mensaxes, ora entre dous ou máis barcos, ora entre un barco e a terra ou o porto. Existen bandeiras de diferentes formas e cores, de maneira que cada unha representa unha letra do alfabeto internacional, así como os números do 1 ao 0.

Cando un barco necesita transmitir unha mensaxe consistente en unha ou varias palabras ou números, iza no mastro dianteiro as bandeiras que representan as letras e números da mensaxe, aliñadas de arriba para abaixo. Se a mensaxe é máis longa, repetirase a operación con novas bandeiras.

Tamén se utilizan as bandeiras individualmente ou en combinacións de dúas, e neste caso teñen un significado determinado segundo un código internacionalmente vixente.

Desde que existe a radio, o uso das bandeiras de sinais para transmitir mensaxes diminuíu notabelmente. No entanto, séguense utilizando de forma xeneralizada as bandeiras individuais ou en combinacións de dúas ou máis, para sinalizar un aviso determinado. Deste xeito na Armada española segue a existir a figura do sinaleiro, que realiza os seus labores en contacto directo coa ponte de mando do navío. Determinadas sinalizacións son neste corpo de obrigado cumprimento, como por exemplo o aviso de práctico a bordo.

Tamén acostuman ser usadas para engalanar ao navío na celebración de actos festivos. Nese suposto as bandeiras adoitan ser izadas desde a proa ata a popa.

Letras e bandeiras[editar | editar a fonte]

Letra	Código NATO	Significado
A	Alfa	Teño un mergullador na agua; consérvese afastado e a pouca velocidade.
B	Bravo	Carga, descarga ou transporte de carga perigosa.
C	Charlie	Si (Afirmativo).
D	Delta	Mantéñase afastado, estou a manobrar con dificultade.
E	Echo	Estou virando para estribor.
F	Foxtrot	Estou con avaría; comunique comigo.
G	Golf	Necesito dun piloto.
H	Hotel	Teño piloto (práctico) a bordo.
I	India	Estou virando para babor.
J	Juliet	Estou con incendio a bordo: mantéñase afastado.
K	Kilo	Desexo comunicarme con vostede.
L	Lima	Vostede debe parar a súa embarcación inmediatamente.
M	Mike	O meu navio está parado.
N	November	Non (Negativo).
O	Oscar	Home ao mar.
P	Papa	No porto: todas as persoas deben regresar a bordo pois o navio vai largar. No mar: pode ser usado por embarcacións de pesca para dicir: "As miñas redes poden obstruílo".
Q	Quebec	Pido libre práctica (licenza para entrar en porto).
R	Romeo	Sen significado (na Mariña Portuguesa esta bandeira poderá significar que o navio está en misión de busca e salvamento (SAR - Search And Rescue), en misión de fiscalización ou a efectuar operacións de reabastecemento no mar).
S	Sierra	Estou dando marcha atrás.
T	Tango	Barcos de pesca: estou pescando ao arrastre en parella. Mantéñase afastado.
U	Uniform	Vai vostede en dirección a un perigo.
V	Victor	Necesito auxilio.
W	Whiskey	Pido asistencia médica.
X	Xray	Pare as súas manobras.
Y	Yankee	Estou manobrando para atrás para fixar a áncora.
Z	Zulu	Necesito un remolcador.