Protestas en Colombia de 2021

Na Galipedia, a Wikipedia en galego.
Manifestacións en Cali o 1 de maio de 2021.

As protestas en Colombia de 2021, chamadas tamén Paro Nacional en Colombia de 2021, son unha serie de manifestacións multifactoriais desencadeadas polo anuncio do proxecto de reforma tributaria proposta polo goberno de Iván Duque Márquez. Comezaron o 28 de abril de 2021 co obxectivo de lograr a eliminación desta proposta, mais as manifestacións intensificáronse principalmente polo uso desproporcionado da forza por parte de membros da Forza Pública.[1][2][3]

A iniciativa dos impostos foi introducida para aumentar o financiamento de Ingreso Solidario, un programa social de renda básica universal estabelecido en abril de 2020 para paliar a crise social por mor da pandemia de COVID-19 en Colombia, mentres que o proxecto de lei 010 propuxo a privatización do sistema de saúde en Colombia.[4][5][6][7][8]

Aínda que os tribunais anticiparon as protestas xeneralizadas e anularon todos os permisos vixentes por temor a unha maior propagación da COVID-19, as protestas comezaron de todas as maneiras o 28 de abril de 2021. Nas grandes cidades como Bogotá e Cali, milleiros de manifestantes saíron ás rúas, nalgúns casos chocando coas autoridades, o que provocou cando menos seis mortes. As protestas continuaron a medrar nos seguintes días e, en medio das promesas do presidente de refacer o seu plan fiscal, culminaron cunha gran protesta o 1 de maio, cadrando co Día Internacional dos Traballadores. O 2 de maio, o presidente Duque declarou que retiraría por completo o seu novo plan fiscal, aínda que non se anunciaron novos plans concretos. Malia os axustes e concesións políticas, as protestas continuaron, impulsadas por intensas represións e denuncias de abusos por parte das autoridades.

Os gobernos de Colombia e Ecuador, citando informes dos seus servizos de intelixencia, alegaron que as manifestacións foron organizadas polo presidente Nicolás Maduro de Venezuela nun esforzo por instalar un goberno aliado en Colombia.[9] A maioría dos analistas coincidiron en que o goberno colombiano esaxerou as influencias externas sobre estas protestas.[10]

A Oficina do Alto Comisionado das Nacións Unidas para os Dereitos Humanos e Human Rights Watch sinalaron abusos da policía contra os manifestantes, mentres que o expresidente Álvaro Uribe Vélez pediu á xente que apoiase as accións da policía e dos soldados durante as protestas.[11]

Notas[editar | editar a fonte]

  1. ↑ Semana (29 de abril de 2021). "Paro Nacional: así titularon los medios internacionales la jornada de protesta en Colombia". Semana.com. Consultado o 30 de abril de 2021. 
  2. ↑ "Paro nacional en Colombia: miles de personas marchan en protesta por la reforma tributaria en medio de un grave repunte de casos de coronavirus". BBC News Mundo. 28 de abril de 2021. Consultado o 30 de abril de 2021. 
  3. ↑ Turkewitz, Julie (2021-05-12). "La fuerza policial de Colombia, hecha para la guerra, encuentra un nuevo frente de batalla en las calles". The New York Times (en castelán). ISSN 0362-4331. Consultado o 2021-11-08. 
  4. ↑ Semana (29 de abril de 2021). "Paro Nacional: así titularon los medios internacionales la jornada de protesta en Colombia". Semana.com Últimas Noticias de Colombia y el Mundo (en castelán). Arquivado dende o orixinal o 01 de maio de 2021. Consultado o 1 de maio de 2021. 
  5. ↑ "Miles de personas marchan en Colombia en protesta por la reforma tributaria en medio de un grave repunte de casos de coronavirus". BBC News Mundo (en castelán). Arquivado dende o orixinal o 01 de maio de 2021. Consultado o 1 de maio de 2021. 
  6. ↑ "Thousands march in Colombia in fourth day of protests against tax plan". Reuters. 1 de maio de 2021. Arquivado dende o orixinal o 01 de maio de 2021. Consultado o 1 de maio de 2021. 
  7. ↑ Rauls, Leonie (29 de abril de 2021). "Could Colombia's Protests Derail its Basic Income Experiment?". Americas Quarterly (en inglés). Arquivado dende o orixinal o 02 de maio de 2021. Consultado o 2 de maio de 2021. 
  8. ↑ "Armando Benedetti anuncia que pedirá el retiro de la reforma a la salud". infobae (en castelán). 2 de maio de 2021. Arquivado dende o orixinal o 02 de maio de 2021. Consultado o 3 de maio de 2021. 
  9. ↑ "Vicepresidenta de Colombia denuncia injerencia de Nicolás Maduro en el paro nacional colombiano". infobae (en castelán). 6 de maio de 2021. Arquivado dende o orixinal o 07 de maio de 2021. Consultado o 7 de maio de 2021. 
  10. ↑ Zilbermints, Regina (2021-05-06). "Colombia's protests are threat, test for US". The Hill (en inglés). Arquivado dende o orixinal o 08 de maio de 2021. Consultado o 8 de maio de 2021. 
  11. ↑ colombiareports (1 de maio de 2021). "Colombia's former president 'glorifying violence': Twitter". Colombia News | Colombia Reports (en inglés). Arquivado dende o orixinal o 01 de maio de 2021. Consultado o 2 de maio de 2021. 
Traído desde «https://gl.wikipedia.org/w/index.php?title=Protestas_en_Colombia_de_2021&oldid=6032294»