Bebedeira

Engadir ligazóns
Na Galipedia, a Wikipedia en galego.

Bebedeira
Título orixinalBebedeira
Autor/aFlorencio Delgado
OrixeGalicia
LinguaGalega
Xénero(s)Poesía
EditorialEditorial Nós
Data de pub.1934
Seguido porGalicia infinda
[ editar datos en Wikidata ]

Bebedeira é un libro de poesía de Florencio Delgado Gurriarán publicado pola Editorial Nós en 1934.[1]

Características[editar | editar a fonte]

É un poemario vinculado ao hilozoísmo de Luís Amado Carballo. Por este libro pertence o autor á Xeración de 1922 ou 1925.[2] Ricardo Carballo Calero descríbeo como «unha turbulenta visión da dionisíaca terra de Valdeorras. É unha descrición poética de forte alento xeórxico, dun ruralismo moi animista e sanguíneo».[3]

Segundo Ricardo Gurriarán:

Flora, cromática da paisaxe valdeorresa, castiñeiros, vento, noite, amoríos, cepeiras, lúa, paxaros, moceo, viño, cores estacionais... en conversa permanente, ligados cun ritmo e unha rima especial, cheos dunha paixón embriagadora, coma o seu título, de musicalidade achandadora, fondamente sensual, difícil de catalogar dentro dos tradicionais codificadores ismos da vangarda poética.[4]

Tivo unha notable acollida da crítica. Carballo Calero, Otero Pedrayo, Xohán L. Ramos e Antón Vilar Ponte deixaron positivas palabras do poemario.

Segundo a Editorial Galaxia:

trinta e dous poemas, dos que algúns deles xa viran a luz en revistas e xornais, onde as árbores, as plantas e a paisaxe adquiren características de personaxe central en poesías de corte sensorial evocadoras da cosmogonía valdeorresa, que teñen a viña e o viño como centro, achegando imaxes e metáforas que converten o poemario no máis importante do hilozoísmo galego, polo que recibiu notables gabanzas da crítica do momento.[5]

Edicións[editar | editar a fonte]

Bebedeira foi editado por Nós en 1934, con portada de José de Castro Arines, discípulo de Castelao e galeguista.

Foi reeditado en Xerais en 2022 da man de Xosé Ramón Pena[6] e en Galaxia no mesmo ano en edición de Dulce Fernández Graña.[7]

Poemas[editar | editar a fonte]

  • Sen título (Bebedeira na ed. de 1934 e Teu cabelo é viño branco en 1981)
Teu cabelo é viño branco,
os teus beizos viño tinto,
os teus ollo augardente...
quixera beberte a bicos!
...[8]
  • Hino ao viño
  • Cantiga de vindima
...
Ai! nena,
a túa boca é toda mosto
agre-doce de garnacha;
o teu ollar, viño novo,
Bébeda ten miña ialma
...[9]
  • Cousas. Dez cousas de Valdeorras (no vran)
...
O carro,
co lombo cangado de herba,
vén, por amostrar os folgos,
cantando unha cantarena
...[10]
  • Cousas das serras
  • Cousas do outono
  • Arelas
  • Quince anos
...
No rigueiro da túa fala
choutan fervenzas de risas;
á anela da túa boca
asoma a fada sorrisa
...[11]
  • Enterro
  • No vencello dos meus brazos
  • Festas. Folión de vran
  • Ruada
...
A rosiña está a chorar;
o piñeiro está a carpir;
a rosiña e mais o vento
van lonxe, no seu fuxir
...[12]
  • Muiñada
  • Aí vén o Maio
  • San Xosé
  • Miudezas. Matanza
  • A cadea
As penas, gardas civís,
ao río Sil lévano preso.
...[13]
  • Dores do agro
  • Amores
  • A lúa, branca pastora
  • Operación
  • Liorta
  • Romanzos. Romanzo do cabaleiro ourizo
O ourizo, siñor feudal
do pazo dos castiñeiros,
inda que llo dea a cara
non é de forca e coitelo.
...[14]
  • Romanzo da terra doente
  • Vente, ventiño do norte
  • Amencer de San Xoán
  • Camiño da serra
  • Romanzo da dona outonía
  • A traxedia dos castiñeiros. O castiñeiro morto
  • Tristura do souto mudo
  • Paisaxes. Paisaxes de inverno
  • Inverno no monte
...
Pra fuxir da neve,
tremendo co frío,
o vento ás carpazas
pídelle agarimo[15]

Notas[editar | editar a fonte]

  1. ↑ Iglesias, Xabier (22/8/2015). "Bebedeira". OslibrosdeAnxelCasal.blogspot.com. 
  2. ↑ Pérez Pena, Marcos (3/7/2021). "Florencio Delgado chegaba cargado de literatura galega feita en México, publicacións moi importantes para os resistentes". Praza.gal. Consultado o 6/7/2021. 
  3. ↑ Carballo Calero 1975, p. 727.
  4. ↑ Gurriarán, Ricardo. "Biografía de Florencio Delgado Gurriarán". Real Academia Galega. Consultado o 2022-02-26. 
  5. ↑ "Bebedeira". Editorial Galaxia. Consultado o 2022-02-21. 
  6. ↑ Pena, Xosé Ramón, ed. (2022). Florencio Delgado Gurriarán. Obra poética. Xerais. ISBN 978-84-1110-060-1. 
  7. ↑ Fernández Graña, Dulce, ed. (2022). Florencio Delgado Gurriarán. Bebedeira. Galaxia. ISBN 978-84-9151-784-9. 
  8. ↑ Pena 2022, p. 103.
  9. ↑ Pena 2022, p. 111.
  10. ↑ Pena 2022, p. 113.
  11. ↑ Pena 2022, p. 120.
  12. ↑ Pena 2022, p. 128.
  13. ↑ Pena 2022, p. 138.
  14. ↑ Pena 2022, p. 145.
  15. ↑ Pena 2022, p. 155.
Traído desde «https://gl.wikipedia.org/w/index.php?title=Bebedeira&oldid=6301133»