Zermatt, antigamente en francés, Praborgne, é unha comuna do distrito de Visp, situada no cantón de Valais en Suíza. Ten unha poboación durante todo o ano duns 5.800 habitantes e está clasificada coma cidade pola Oficina Federal de Estatística de Suíza (FSO).
Atópase no extremo superior do val de Mattertal a unha altura de 1.620 metros, ao pé dos picos máis altos de Suíza. Localízase a uns 10 km do Col de Theodul, de máis de 3.292 metros de altura, que limita con Italia. Zermatt é a comuna máis ao sur da Sprachraum (área lingüística) alemá.
Zermatt é unha famosa estación de montañismo e esquí dos Alpes suízos, xunto con Sankt Moritz, Klosters-Serneus e Gstaad. Até mediados do século XIX era predominantemente unha comunidade agrícola. En 1865 produciuse a primeira e tráxica ascensión ao Cervino (Matterhorn), á que seguiu unha carreira polas montañas que arrodeaban a vila, o que deu inicio á construción de numerosas instalacións turísticas.
En Zermatt está prohibido o uso de automóbiles ou vehículos que usan combustibles, permitíndose unicamente o uso de coches eléctricos ou das ambulancias e servizos de seguridade cidadá. A vila é accesíbel en tren desde a comuna de Täsch (onde empeza a prohibición), así como desde Visp grazas á compañía de trens Matterhorn-Gotthard-Bahn, que xestiona a liña do Glacier Express xunto co Ferrocarril Rético.
.jpg?lang=gl)
