The Forest é un videoxogo de supervivencia e terror en primeira persoa desenvolvido por Endnight Games para Windows. A versión en alpha do xogo lanzouse o 30 de maio de 2014.[1]
En The Forest, o xogador debe sobrevivir nunha illa arbolada despois de converterse no único supervivente dun accidente de avión. Para logralo deberá crear construcións, armas e outros útiles de supervivencia. Os habitantes da illa son unha tribo de mutantes caníbales nocturnos, que viven nas cavernas da illa. Mentres que non son sempre hostís co xogador, o seu comportamento habitual é agresivo.[2] Porén, os creadores do xogo quixeron que o propio xogador se preguntase se a tribo caníbal é a inimiga do xogador, ou vice versa.[2]
The Forest inspirouse en filmes de culto como The Descent e Cannibal Holocaust e en videoxogos como Minecraft e Don't Starve,[3][4] e foi aceptado como parte do Steam Greenlight en 2013.[5] Os desenvolvedores de Endnight Games comentaron que Disney foi unha inspiración para o xogo, xa que non querían que fose completamente "escuro e deprimente".[3] O xogo está a ser adaptado para que sexa compatible co dispositivo de realidade virtual Oculus Rift.[6] O equipo está a considerar un modo de multixogador.[3]