Sociedade Galega de Terminoloxía
| Sociedade Galega de Terminoloxía | |
|---|---|
 | |
| Tipo | organización |
| Data de fundación | 2004 |
| Sede | Vigo |
| Enderezo | Apartado de Correos 95, 15780, Santiago de Compostela |
| País | Galicia |
| [ editar datos en Wikidata ] | |
A Sociedade Galega de Terminoloxía (SGaT) é unha asociación sen ánimo de lucro formada por persoas interesadas na terminoloxía galega.
Historia[editar | editar a fonte]
O día 6 de outubro do ano 2004 diferentes investigadores, tradutores e especialistas en terminoloxía reuníronse en Santiago de Compostela, en dependencias do Consello da Cultura Galega para constituíren a Sociedade Galega de Terminoloxía.[1] Nesta reunión formounse unha Comisión Promotora, que convocou a todas as persoas interesadas a participar na súa primeira Asemblea Xeral, que tivo lugar o día 27 de xaneiro de 2005, ás 17.00 h, no Salón de Graos da Facultade de Filoloxía da USC. Nesta xuntanza presentouse oficialmente a asociación e elixiuse a súa primeira Xunta Directiva, ao tempo que se debateron as liñas de traballo que a entidade desenvolverá no futuro.[2]
Primeira Xunta Directiva[editar | editar a fonte]
Na antedita asemblea quedou constituída a primeira xunta directiva da SGaT, formada polas seguintes persoas:
- Presidenta: Iolanda Galanes Santos [3]
- Vicepresidente: Luís Daviña Facal [3]
- Secretaria: Berta Castaño Torrado
- Tesoureira: Anxos Sobriño Pérez
- Vogal 1º: Ana Martínez Fernández
- Vogal 2º: José Ramóm Pichel Campos
- Vogal 3º: Salvador Pérez Froiz
- Vogal 4 º: Manuel Núñez Singala
O día 8 de xuño de 2005, a Sociedade Galega de Terminoloxía organizou un acto académico, na sede do Consello da Cultura Galega, no Pazo de Raxoi, para presentar as súas actividade para este ano, a súa páxina web e diverso material informativo. Neste acto pronunciou unha conferencia a presidenta da Asociación Española de Terminoloxía, Teresa Cabré, co título "Xestión terminolóxica das linguas minorizadas: presentación xeral e algúns apuntamentos sobre o galego".[4]
O día 25 de abril de 2006 a profesora Rute Costa Vilhena, presidenta da Asociación Europea de Terminoloxía e da Associação Portuguesa de Terminologia, pronunciou, no Salón de Actos do Consello da Cultura Galega, a conferencia "A cooperación en terminoloxía no contexto internacional", acto organizado en colaboración co Consello da Cultura Galega.[5]
Fins da sociedade[editar | editar a fonte]
A SGaT ten como obxectivos, entre outros, facilitar o coñecemento e a cohesión entre as persoas relacionadas coa terminoloxía en Galicia, promover accións formativas e propiciar o intercambio de información e coñecementos neste eido.[1]
Notas[editar | editar a fonte]
- ↑ 1,0 1,1 Créase a Sociedade Galega de Terminoloxía CCG, 13/10/2004. Consultada o 4 de outubro de 2018.
- ↑ A Sociedade Galega de Terminoloxía convoca a súa primeira Asemblea Xeral CCG, 26/01/2005. Consultada o 4 de outubro de 2018.
- ↑ 3,0 3,1 Sociedade Galega de Terminoloxía (SGaT) Xunta de Galicia. Consultada o 4 de outubro de 2018.
- ↑ A Sociedade Galega de Terminoloxía inicia as súas actividades cunha conferencia de Mª Teresa Cabré CCG, 7/6/2005. Consultada o 4 de outubro de 2018.
- ↑ A terminóloga portuguesa Rute Costa fala en Santiago de cooperación internacional, en Vieiros.com.