Rally de Terra do Carballiño de 1993
| Rally de Terra do Carballiño de 1993 | |
|---|---|
| Categoría |  Galicia |
| Localización | O Carballiño Boborás O Irixo |
| Ámbito | Rexional |
| Superficie | Terra |
| Tramos | 3 |
| Gañadores | |
| Piloto campión | José Alonso |
| Participantes | |
| Pilotos | 60 |
| Anterior | Rally de Terra do Carballiño de 1992 |
O Rally de Terra do Carballiño de 1993 foi a sexta edición de dito rally. Celebrouse o 26 de setembro de 1993 e foi a segunda proba puntuable para a tempada 1993 do Campionato de Galicia de Rallys de Terra. O vencedor foi o piloto José Alonso conducindo un Citroën AX 4x4.[1]
O rally estivo protagonizado polas protestas dun grupo de mulleres, veciñas de Gabián, no concello de Boborás, que impediron o paso dos vehículos por unha das pistas forestais, por desacordos coa organización.[2]
Itinerario[editar | editar a fonte]
Estaban programados 244,575 km, dos cales 34 serían cronometrados, divididos en tres treitos con dúas pasadas a cada un deles. Os treitos cronometrados a percorrer eran Feás-A Fenteira, Alto do Paraño e Osmo-Cenlle.[3] Por mor das protestas das "mulleres do Gabián" e dun pequeno incendio a proba reduciuse a só tres treitos e uns 15 km cronometrados.[1]
Protestas das "mulleres do Gabián"[editar | editar a fonte]
Un grupo de mulleres veciñas de Gabián autodenominadas "as mulleres do Gabián" cobraron protagonismo no rally, cortando o tráfico e impedindo a competición en parte do percorrido.[1] Días antes da celebración do rally xa mostraran a súa oposición ao paso da proba por unha das pistas forestais, entre Gabián e o alto do Paraño, alegando que dito camiño fora aberto co seu traballo e o seu diñeiro e que nos anos anteriores o paso do rally o deixara bastante estragado, tendo que amañalo elas sen a axuda de ninguén.[2] Por este motivo pediron 100.000 pesetas á organización para permitir o paso da proba, petición que foi aceptada nun principio pola organización. Con todo, tras o pago da metade da cantidade acordada, o ICONA obrigou ás mulleres a devolver o diñeiro.[2]
Na tarde anterior á celebración da proba as mulleres abriron unha gabia de grandes dimensións na pista forestal, que foi pechada pola noite e reaberta de novo no amencer do día do rally. Atrincheiráronse nela "armadas" con apeiros de labranza e colocaron ademais bloques de cemento e grandes pedras obstaculizando o camiño.[2] Finalmente conseguiron o seu obxectivo e suspendéronse as dúas pasadas por dito treito.[1]
Desenvolvemento[editar | editar a fonte]
O Citroën AX 4x4 do vigués José Alonso dominou os dous primeiros treitos, seguido de preto polo Peugeot 205 GTI de Manuel Senra e Pepe Maceiras, e con Andrés González en terceiro lugar. No derradeiro treito, o coche de Senra envorcou a falta de poucos metros para a meta, deixando o camiño libre para a vitoria de Alonso.[1]
Clasificación[editar | editar a fonte]
| Pos | Piloto | Copiloto | Vehículo |
|---|---|---|---|
| 1 | José Alonso
|
Agustín Rodríguez
|
Citroën AX 4x4 |
| Abandonos | |||
| - | Manuel Senra
|
Pepe Maceiras
|
Peugeot 205 GTI |
Notas[editar | editar a fonte]
- ↑ 1,0 1,1 1,2 1,3 1,4 "Un incendio y protestas de los vecinos en el Rally de Carballiño". La Voz de Galicia (en castelán). 2 de setembro de 1993. p. 56.
- ↑ 2,0 2,1 2,2 2,3 "«As mulleres do Gavián»". La Voz de Galicia (en castelán). 28 de setembro de 1993.
- ↑ "El Ralli de Terra también existe". La Voz de Galicia (en castelán). 26 de setembro de 1993.
| Predecesor: Rally de Narón |
Campionato de Galicia de Rallys de Terra Tempada 1993 |
Sucesor: Rally de Terra de Lugo |