Parque de San Lázaro

Coordenadas: 42°20′29″N 7°51′50″O / 42.341436111111, -7.8638027777778

O Parque de San Lázaro, situado no centro da cidade de Ourense, ocupa unha planta trapezoidal distribuída en dous niveis e organizada en rúas con bancos, rodeados de abundante vexetación arbórea.

Historia e características[editar | editar a fonte]

O parque caracterízase por ter unha estatua enorme, esculpida no ano 1951 por Francisco Asorey, en recordo ás vítimas nacionais da Guerra civil española. O pedestal, situado na principal entrada do parque, representa un anxo caído que ten unha coroa de loureiro entre as súas mans.

No contorno do parque desenvólvese, xunto aos edificios administrativos, a principal actividade comercial e económica da cidade. Antigamente foi lugar do hospital de peregrinos, o lazareto, de aí a procedencia do seu nome. En honor a San Lázaro existiu unha capela que logo foi trasladada ó barrio do Peliquín.

Hoxe encóntrase a Igrexa de San Francisco que foi construída no século XIV no alto da cidade. No ano 1929 trasladouse, pedra a pedra, ó Parque de San Lázaro. A fachada de Igrexa caracterízase por ter na parte superior do corpo un rosetón, e a porta, decorada con triplo arquivolta. A entrada está decorada por un gaiteiro.^[1]

O parque foi durante un tempo un campo da feira e, pouco a pouco, foi reducido pola construción de novos edificios, especialmente pola construción do Goberno Civil (Subdelegación do Goberno) e pola Torre de Ourense (Hotel San Martín), durante anos símbolo da cidade.

Este parque ten un día tradicional en que se celebra a festa de San Lázaro en honor ó santo. Ese día comeza a procesión do santo acompañado do son dos gaiteiros e cabezudos. Tamén se colocan os tradicionais postos de rosquillas diante do parque. Para rematar a festa realízase unha queima de «Madamitas», que son pequenas figuras que xiran en torno dun eixe e son totalmente destruídas polas repetidas explosións dos petardos que se aloxan no seu interior.^[2]

Por outra banda, destaca o monumento O Carrabouxo, que se encontra na parte superior en honor o caricaturista Xosé Lois González Vázquez, pai do personaxe famoso pola viñeta humorística do xornal local La Región. A escultura é obra de César Lombera (1992).

O parque dispón dunha zona de xogos infantís distribuídas por idades e unha fonte instalada no centro.

A fonte foi traída do Mosteiro de Santa María de Oseira para ao Xardín do Posío e logo ó parque San Lázaro, onde chegou en mal estado. Esta caracterízase por ter un gran vaso inferior, polo que saen chorros cara ao centro e toda ela está rodeada dunha plataforma de granito. Onde está situada dispón duns bancos para sentar.^[3]

Fronte ó parque encóntrase a escultura de Antonio Colemán e Estanislao Reverter apoiados nun coche, facendo homenaxe a 45º edición de Rally de Ourense. A obra foi realizada polo artista Ramón Conde.