A miña familia e outros animais

Na Galipedia, a Wikipedia en galego.
(Redirixido desde "My Family and Other Animals")
A miña familia e outros animais
Título orixinal My Family and Other Animals
Autor Gerald Durrell
Orixe Reino Unido
Lingua inglés
Tema(s) Saga da vida de Gerald Durrell en Corfú
Xénero(s) Novela autobiográfica
Editorial Flag of the United Kingdom.svg Rupert Hart-Davis
Galicia Sushi Books
Data de pub. Flag of the United Kingdom.svg 1956
Galicia 2016
Seguido por Birds, Beasts, and Relatives (1969)
The Garden of the Gods (1978)
Tradución Susana Collazo

A miña familia e outros animais é unha novela autobiográfica en lingua inglesa do naturalista Gerald Durrell, publicada en 1956 co título orixinal de My Family and Other Animals. Foi traducida ao galego por Susana Collazo e publicada en 2016 por Sushi Books[1].

Conta as súas vivencias na illa grega de Corfú na súa infancia, entre 1935 e 1939. Describe a vida da familia Durrell na illa dun xeito humorístico, ao tempo que fala da fauna da rexión. É a primeira parte da súa triloxía de Corfú, completada con Birds, Beasts, and Relatives (1969) e The Garden of the Gods (1978). O título da obra podería estar inspirado na obra de Louis Bromfield Animals and Other People.

En 1956 Durrell xa publicara numerosos libros sobre as súas expedicións zoolóxicas, pero este libro axiña acadou sona pola esaxeración cómica das personalidades dos membros da familia (especialmente do seu irmán maior Larry) e polo agarimosa e natural relación cos animais da illa. Amais de lanzar a súa carreira como propietario do Jersey Zoological Park e como escritor e personalidade da televisión, a obra contribuíu a aumentar o turismo en Corfú[2].

Trama[editar | editar a fonte]

O libro narra de forma autobiográfica cinco anos da infancia de Gerald Durrell (dos 10 aos 15), da súa familiar, as súas mascotas e da vida en xeral durante a súa estancia na illa de Corfú. O libro aparece dividido en tres seccións, marcando as tres vilas onde que a familia tivo como fogar na illa. Amais do propio Gerald (o máis novo), á illa chegan a nai viúva, o irmán maior Larry (que quere ser escritor), Leslie (que adora as armas de fogo) e Margo, xunto co can Roger. Axiña traban amizade co taxista Spiro, que os sobreprotexe e acaba por converterse en amigo da familia. Gerald comeza a recibir clases de Theodore Stephanides, que inicia a Gerald na historia natural. Posteriormente Gerald coñecerá outros titores e amigos da illa, amais de amigos que veñen visitar a Larry.

A comedia humana aparece mesturada con descricións da vida animal que Gerald observa nas súas expedicións ao redor das casas familiares, a illa e a costa. Ás veces devolve os animais ao seu hábitat e outras veces lévaos como mascotas, como a tartaruga Aquiles, a pomba Quasimodo, o bufo Ulysses, numerosas arañas, a gaivota Alecko, os cans Widdle e Puke e varios paxaros.

Notas[editar | editar a fonte]

  1. Ficha na web de Sushi Books.
  2. Botting, Douglas: Gerald Durrell - the authorised biography. London, 1999. HarperCollins. ISBN 0-00-255660-X (en inglés).