Mujeres Libres

Na Galipedia, a Wikipedia en galego.
Saltar ata a navegación Saltar á procura

Mujeres Libres foi unha organización feminista dentro do anarcosindicalismo español que existiu entre abril de 1936 a febreiro de 1939, durante a guerra civil española. Xunto á Confederación Nacional do Traballo, a Federación Ibérica de Mocidades Libertarias e a Federación Anarquista Ibérica constituíu unha das organizacións clásicas do movemento libertario español.

Malia a igualdade de xénero que propuña a CNT dende as súas orixes, moitas das mulleres que militaban no movemento pensaron que era preciso que houbese unha organización específica para desenvolver plenamente as súas capacidades e a súa loita política.[1]

Historia[editar | editar a fonte]

Cuberta do número 9 da revista "Mujeres Libres" (1938).

En 1934, Amparo Poch y Gascón, Lucía Sánchez Saornil e Mercedes Comaposada fundaron a revista Mujeres Libres, que era voceira da Federación Mujeres Libres, a prol da liberación da muller obreira. A Federación medrou axiña e en outubro de 1938 tiña máis de 20 000 membros.[2] Era unha revista para mulleres e escrita por mulleres. Vetou a colaboración de homes, agás o artista Baltasar Lobo, que era ilustrador e maquetista da publicación.

A educación e a capacitación profesional eran premisas determinantes á hora de conquistar os dereitos das obreiras no eido dunha formación libertaria. O seu obxectivo era a emancipación da muller da servidume, da ignorancia e da submisión sexual.

As agrupacións Mujeres Libres de Madrid e o Grupo Cultural Feminino de Barcelona fusionáronse en setembro de 1936 na Agrupación de Mujeres Libres. En Barcelona a Agrupación de Mujeres Libres estabeleceu comedores colectivos, organizou cursos de alfabetización, enfermaría e puericultura e enviou víveres ó Madrid asediado.

A Agrupación Mujeres Libres abriu unha Escola de Choferes para mulleres nos Servizos de Sanidade da retagarda. Tamén impartiu cursos para capacitar a mulleres como condutoras de tranvías.

Notas[editar | editar a fonte]

  1. Liaño Gil, Conchita. Mujeres Libres. Luchadoras libertarias. Fundación Anselmo Lorenzo. ISBN 84-86864-33-X na páxina 151
  2. Una mujer libre. Amparo Poch y Gascón, médica y anarquista. Flor del Viento Ediciones. ISBN 84-89644-76-4.