Manuel Torreiglesias
| Biografía | |
|---|---|
| Nacemento | (es) Manuel Antonio Torre Iglesias  16 de marzo de 1941 Pontedeume, España |
| Morte | 19 de maio de 2025 (84 anos) |
| Causa da morte | insuficiencia renal |
| Residencia | Pontedeume Madrid Xàbia |
| Educación | Universidade de Salamanca - Q5488368  |
| Actividade | |
| Ocupación | presentador de televisión, locutor de radio, escritor |
| Empregador | Intereconomía Corporation (en) (2009–2013) RTVE (1964–2009) |
| Premios | |
| |
   | |
Manuel Antonio Torre Iglesias, máis coñecido como Manuel Torreiglesias, nado en Pontedeume o 16 de marzo de 1941 e finado na comunidade de Madrid o 19 de maio de 2025, foi un xornalista e escritor galego.
Traxectoria
[editar | editar a fonte]Estudou para mestre e logo licenciouse en Filosofía e Letras na Universidade de Salamanca. Mudouse a vivir a Madrid e en 1964 entrou a traballar en Televisión Española como axudante de realización no programa concurso Cesta y puntos, emitido polo primeiro canal, daquela o principal dos dous canais de televisiín que había.
Posteriormente traballou na radio (Radio Nacional de España) en programas como En familia ou Tiempo de vivir. En 1974 pasou a dirixir e presentar un programa de divulgación e saúde, Escuela de salud, o tema que se converterá no centro da súa traxectoria televisiva para o resto da súa carreira profesional.
Nos anos oitenta realizaría programas de debate e denuncia sobre temas de actualidade social: Voces sin voz (1981-1982) e Usted, por ejemplo (1984), ambos en TVE. A principios de 1990 presentou diversos programas na Televisión de Galicia e na Radio Galega, como Boa saúde ou Meigas fóra, centrados en temas de saúde e de divulgación.
Saber Vivir
[editar | editar a fonte]A partir de 1996 regresou a Televisión Española para dirixir e presentar o programa Saber Vivir, outra emisión de saúde. A súa grande audiencia nas mañás (con máis dun 25% de share e máis de medio millón de espectadores[1]) permitiulle desenvolver unha ampla gama de produtos paramédicos e publicacións asociadas ao espazo. O 7 de maio de 2009, logo de doce anos de dirección ininterrompida, presentou o seu espazo por última vez. RTVE rescindiu o seu contrato nese momento de forma imprevista, acusándoo de fraude na xestión publicitaria do programa[2].
Tamén traballara en medios escritos con colaboracións de divulgación e entrevistas, como en Muy interesante[3]. Logo do seu paso por TVE tamén presentou espazos noutras cadeas, como a ultradereitista Intereconomía.[4]
Falecemento
[editar | editar a fonte]Nos últimos anos da vida padeceu unha enfermidade nefrolóxica, o que o obrigaba a dializarse, e necesitaba dun transplante de riles que nunca se produciu. Morreu na Comunidade de Madrid, e foi velado no tanatorio de Alcobendas.
Vida persoal
[editar | editar a fonte]Foi discreto coa súa vida persoal e non fixo público ter parella nin non tela.
Obra
[editar | editar a fonte]- Mayores con salud (1999)
- Comida Sana (2000)
- Para ir como un reloj: Adiós al estreñimiento (2003)
- Gran Guía de la salud (2004)
- Para salir de dudas (2005)
- Fibromialgia: Cuando el dolor se convierte en enfermedad (2005)
Notas
[editar | editar a fonte]- ↑ "No he cogido ni un duro de nadie" Arquivado 08 de maio de 2009 en Wayback Machine., Ver tele, 8/5/09
- ↑ "TVE despide a Torreiglesias por irregularidades". El Mundo (en castelán). 8 de maio de 2009.
- ↑ BARROSO, Julio, Famosos al descubierto: 45 perfiles, Madrid:Ediciones Nowtilus, 2005
- ↑ "Falece o eumés Manuel Torreiglesias, histórico presentador de 'Saber vivir'". Nós Diario. 19 de maio de 2025.
