Arola

Arola amosando os sifóns.

Reino:	Animalia
Filo:	Mollusca
Clase:	Bivalvia
Orde:	Veneroida
Familia:	Mactridae
Xénero:	Lutraria
Especie:	L. lutraria

Nome binomial

'Lutraria lutraria'
(Linnaeus, 1758) ^[1]

Sinonimia

Chama magna da Costa, 1778
Lutraria elliptica Lamarck, 1801
Lutraria elliptica var. latior Philippi, 1844
Lutraria lutraria var. panormensis Gregorio, 1885
Lutraria solida Philippi, 1851
Lutraria vulgaris Fleming, 1828

Mya lutraria Linnaeus, 1758 (basionym)

A arola^[2] ou mexarela^[3] (Lutraria lutraria, Linnaeus 1758) é un molusco bivalvo pertencente á familia dos máctridos (Mactridae), de tamaño relativamente grande. Existe outra especie semellante, a Lutraria magna, que se caracteriza pola marxe dorsal curvada cara a dentro, e cuncha máis robusta e de cor parda sucia. Non adoita superar os 10 cm de lonxitude.

Descrición

A cuncha é de perfil elíptico, cuns 13 cm de lonxitude e unha anchura duns 5–6 cm. As valvas non pechan polos extremos, deixando certa separación. A cor habitual é branca ou amarelenta, pero o periostraco é dun castaño escuro. Polo interior é branca coa marca do seo paleal ben visible. Presenta unha liñas de crecemento concéntricas moi finas.

Na valva dereita hai dous dentes cardinais e outro lateral; a esquerda ten dous cardinais e dous laterais.

Os sifóns son notablemente longos e fortes.

Hábitat e bioloxía

Vive sobre fondos de area, limo ou grava, ata uns 100 metros de profundidade. Distribúese pola costa leste do Atlántico, desde Noruega ata o sur de África.

Aproveitamento pesqueiro e comercial

A arola é un molusco comestible pero tan pouco apreciada que non se practica a captura desta especie. Cando se pesca, dedícase exclusivamente á conserva.

Rosa Ramonell achega o dato histórico de que os romanos incluían arolas nos seus banquetes.

A arola en Galicia

Ríos Panisse recolleu para esta especie a seguinte sinonimia: ameixola da lama, navallón (porque lembra á navalla) e zapatela, ademais de mexarela, mexona, mixela ou mixota, nomes estes debidos ós fortes chorros de auga que expulsa polos sifóns.

Eladio Rodríguez recolle a locución Vaite á arola, fórmula de desentendemento que expulsa a alguén molesto.

Notas

↑ World Register of Marine Species
↑ Definición de Arola no Dicionario de Galego de Ir Indo e a Xunta de Galicia.
↑ Definicións no Dicionario da Real Academia Galega e no Portal das Palabras para arola.

Véxase tamén

Bibliografía

RAMONELL, Rosa: Guía dos mariscos de Galicia. Galaxia, Vigo 1985.
RÍOS PANISSE, M. Carmen: Nomenclatura de la flora y fauna marítimas de Galicia (Invertebrados y peces). Anejo 7 (1977) de Verba.
RODRÍGUEZ GONZÁLEZ, Eladio: Diccionario enciclopédico gallego-castellano. Galaxia, Vigo 1958-1961.

Outros artigos

Lista de bivalvos de Galicia

[WoRMS-1] World Register of Marine Species

[2] Definición de Arola no Dicionario de Galego de Ir Indo e a Xunta de Galicia.

[3] Definicións no Dicionario da Real Academia Galega e no Portal das Palabras para arola.

[1]

[2]

[3]