Kussondulola

Kussondulola
Instancia de grupo musical
Xénero reggae
Datas
Inicio de actividade 1995
Data de fundación 1995
Localización
País de orixe Portugal
Fontes e ligazóns
Redes
Wikidata

Kussondulola é unha banda de reggae angolana residente en Portugal. O líder da banda é o angolano Janelo da Costa, que ademais de músico, tivo tamén unha carreira no fútbol, xogando entre outros clubs, no Inmortal Deportivo Club, principal club de Albufeira.

Traxectoria

En 1995, o grupo lanzou o seu primeiro álbum, Tá-se Ben, que incluía cancións como "Dança No Huambo" e "Perigosa", entre outras. Para promocionar o seu traballo, o grupo tocou en Vilar de Mouros, lanzou o disco en España e venceu no Prémio Banda Revelação dos Premios Blitz.

En 1998, lanzaron o álbum Baza Não Baza, seguido de O Amor É... Bué no ano 2001. En 2004, lanzaron o álbum Cumué?, que reúne os melores temas do grupo. O álbum Survivor, lanzado en 2005, inclúe varios duetos con nomes como Vitorino (en "Maria Tem Fé em Jah"), Kalú (en "Survive Todos os Dias"), Rui Reininho (en "Reggae no Porto"), Rui Veloso e Nanu (en "Viver Sozinho Não Quero") e Miguel Ângelo (en "Desastre Natural"). Kalaf, Sara Tavares, Sam, Dora e Sandra Fidalgo e Legalize son outros dos convidados do disco.

No ano 2006, lanzaron o álbum Guerrilheiro. Conmemoraron 15 anos de carreira cunha edición especial con temas inéditos e ao vivo, reunidos en dous discos de orixinais gravados en 2007, Madié e Natalício, e nunha edición ao vivo da Tour Mayombe 2006. Inclúe 40 temas entre inéditos, gravacións ao vivo, dubs e riddims en diferentes versións de varios éxitos da banda.

Xabarín Club

Kussondulola colaborou en 1995 no programa de televisión Xabarín Club co tema "Tá-se ben na radio" e un videoclip de Ricardo Llovo. O tema formou parte da recompilación A cantar con Xabarín, unha serie de 5 CDs con cancións gravadas por grupos galegos, portugueses, africanos e casteláns. A serie foi recompilada en 2004 nos volumes VI e VII, un CD con 23 temas e un DVD con 48 videoclips.

Discografía

Álbums de estudio

• Tá-se Bem (1995, EMI)
• Baza Não Baza (1998, EMI)
• O Amor É... Bué (2001, EMI)
• Survivor (2005, Som Livre)
• Guerrilheiro (2006, Zona Música)
• Madié Natalício (2007)

Recompilacións

• Cumué? - O Melhor dos Kussondulola (2004, EMI)

Álbuns ao vivo

• Vive! Tens de Viver (2002, Kussondulola - Edições Musicais)

Véxase tamén

Ligazóns externas

• Kussondulola.com Arquivado 13 de maio de 2010 en Wayback Machine. (en portugués)