A galiña azul (escolas)

As galescolas son centros de educación infantil de titularidade pública dirixidos a nenos e nenas de 0 a 3 anos.

Están integradas na rede xestionadas polo Consorcio Galego de Servizos de Igualdade e Benestar, que comezou a funcionar no ano 2007 e do que forman parte a Vicepresidencia da Xunta de Galicia, e están localizadas en numerosos concellos urbanos e rurais. As galescolas comezaron a funcionar a partir do curso 2007-2008.

Estes centros promoven unha oferta educativa de calidade en lingua galega a nenas e nenos desta idade. Como se recolle no seu Proxecto Educativo, foméntase o desenvolvemento integral das nenas e os nenos ao tempo que se favorece a conciliación da vida laboral e familiar dos seus proxenitores.

Adóptase o traballo en equipo (educativo e de servizos) como forma de organización. Cada grupo de nenas e nenos é atendido por dous ou dúas profesionais da educación, no que se denomina "parella educativa".

O traballo en rede permite compartir os recursos, os servizos e os elementos de coordinación e apoio pedagóxico que as axuda a elaborar, executar e avaliar as súas propostas educativas, na liña doutras experiencias institucionais contrastadas de atención á primeira infancia.

Os sectores que conforman a comunidade educativa están representados en órganos colexiados como o consello de participación.

Lingua

A lingua de comunicación cos nenos e as nenas é o galego, seguindo o obxectivo enunciado no Plano de Normalización Lingüística de Galicia (aprobado en 2004 por unanimidade de todas as forzas políticas con representación no Parlamento de Galicia): Garantir unha oferta educativa en galego nos primeiros treitos educativos na perspectiva de que eeste idioma se converta na lingua primeira do sistema educativo de Galicia.

Véxase tamén

Outros artigos

• Normalización lingüística

Ligazóns externas

• Rede das galescolas, onde se poden atopar recursos, novas e os blogs das galescolas.