Campolongo, Negreira

Santa Cruz de Campolongo é unha parroquia que se localiza no oeste do concello de Negreira. Limita co concello de Outes e co de Mazaricos.

Segundo o padrón municipal de 2004 tiña 246 habitantes (127 mulleres e 119 homes) distribuídos en 7 entidades de poboación, o que supón unha diminución en relación ao ano 1999 cando contaba con 279 habitantes.

Como ben indica o seu nome a súa patrona é Sta Cruz, que se honra o día 14 de setembro. Tamén se celebra o Carme o primeiro domingo de setembro; e outra festa moi importante é Sta. Irene que se honra o día 20 de outubro. Ainda que tamén conta cunha celebración moi antiga que é a do Corazón de Xesús que se honra o 03 de maio (nome que adoptou a propia Asociación de Veciños da parroquia "3 de Maio").

Campolongo está rodeado de natureza virxe, muíños, fontes de augas cristalinas e sabedoras, camiños ancestrais nos que se respira aire limpo e libre de contaminación, e que invitan a un agradable paseo baixo distintos tipos de árbores que gardan e calan a historia do lugar, e tamén ó longo do río coa música do murmuido do mesmo amenizándonos a camiñata. E unha verdadeira cura antiestrés. A xente de Sta. Cruz de Campolongo é aberta, agradable e acolledora. Tradicionalmente os habitantes de Campolongo adícanse á agricultura, queren e respetan ó noso animal totémico por excelencia, a vaca. E sempre hai tempo para as relacións humanas cos veciños, e cos visitantes. Algúns dos foráneos que visitaron Campolongo alcumárono "o ceo". Por algo será.-