Escudo da provincia de Lugo

Escudo oficial da provincia de Lugo desde 1984, oficializado de novo en 2006

O escudo da provincia de Lugo ten a súa orixe nas armas do escudo da capital que, durante algúns anos, foi tamén o da provincia. O primeiro escudo provincial data de 1877, a maior parte dos elementos deste foron adoptados das armas da cidade pero introducíronse nel algunhas diferenzas, entre as que destacou que o brasón provincial é, dende entón, un escudo cortado.

En 1932, e a raíz da proclamación da II República, introducíronse algúns cambios no escudo, como a substitución da coroa real por outra mural ou, en 1942 a modificación novamente para engadirlle o xugo e as frechas, símbolo da Falanxe e do réxime franquista. En 1958 retiráronse estes símbolos, pero adoptouse unha segunda versión do escudo provincial no que figuraban tamén os que correspondían cos partidos xudiciais; e nos anos setenta introducíronse algunhas modificacións exteriores. En 1984 decidiuse unificar o modelo oficial das armas provinciais e, finalmente, o 3 de abril de 1986, aprobouse o modelo que se entende agora como oficial mediante un Decreto da Xunta de Galicia no que aparece descrito o escudo como:

"Un escudo cortado: 1º de azur, un cáliz de ouro, sumado da Sacra Forma de prata, radiante de ouro, e deitado de dous anxos en adoración afrontados, de prata, sobre senllas nubes do mesmo metal, 2°, de goles, unha torre donxonada dunha peza, de prata, aclarada de azur, e abeirada por dous leóns enfrontados e rampantes contra a torre, de ouro. Ao timbre, coroa real, forrada de goles ou vermello, pechada, que é un círculo de ouro, engastado de pedras preciosas, composto de oito floróns de follas de acanto, visibles cinco, interpoladas de perlas e de cada unha das súas follas saen cinco diademas sumadas de perlas que converxen nun mundo azur, co semimeridiano e o ecuador de ouro, sumado de cruz de ouro."

Outras versións

• 
  Armas da Provincia de Lugo sen coroa
• 
  Outra versión heráldica
• 
  Outra versión do mesmo brasón
• 
  O escudo formou parte da bandeira da provincia, pero foi modificada en 2009 por unha versión máis sinxela

Véxase tamén

Outros artigos

• Galería de imaxes de escudos de concellos da provincia de Lugo
• Escudo de Lugo
• Provincia de Lugo

Ligazóns externas

• Regulamento de Identidade Corporativa da Deputación de Lugo, BOP núm. 288, 18/12/2006
• Información sobre o escudo ofrecida pola Deputación Provincial