Endonuclease UvrABC

Na Galipedia, a Wikipedia en galego.
Saltar ata a navegación Saltar á procura

A endonuclease UvrABC é un complexo multiencimático da bacteria Escherichia coli implicado na reparación do ADN por reparación por escisión de nucleótidos, e denomínase tamén excinuclease. Este proceso de reparación por UvrABC, ás veces chamado proceso de parche curto, implica a eliminación de doce nucleótidos nos sitios onde se produciu unha mutación xenética seguida da acción dunha ADN polimerase, que substitúe eses nucleótidos anormais polos nucleótidos correctos, completando así a reparación do ADN. As subunidades que constitúen este encima están codificadas nos xenes uvrA, uvrB e uvrC. Este complexo encimático pode reparar moitos tipos de danos no ADN, incluíndo a formación de dímero de ciclobutilo.[1]

Mecanismo[editar | editar a fonte]

O mecanismo segue a seguinte secuencia:

  1. Dúas proteínas UvrA forman un dímero e ambas as dúas teñen actividade de ATPase/GTPase.
  2. O dímero UvrA únese a un dímero UvrB[2] e forma un complexo que pode detectar os danos no ADN. O dímero UvrA funciona como a unidade responsable para a detección de danos no ADN, probablemente por medio dun mecanismo de detección de distorsións na dobre hélice do ADN.
  3. Despois da unión do complexo UvrA2B2 a un sitio cun suposto dano, o ADN rodea a UvrB.[3]
  4. O dímero UvrA libérase e vaise, e seguidamente chega a proteína UvrC, que se une a UvrB, formando un novo complexo UvrBC.
  5. UvrC é responsable da clivaxe de nucleótidos a ambos os lados da zona do ADN danado.[4] Este complexo corta un enlace fosfodiéster situado a catro nucleótidos de distancia augas abaixo do dano no ADN, e corta tamén outro enlace fosfodiéster situado a oito nucleótidos augas arriba do sitio do dano, e créase así un segmento de doce nucleótidos escindido.
  6. A ADN helicase II (ás veces chamada UvrD) chega despois e retira o segmento escindido eliminando o apareamento de bases. O UvrB aínda permanece no lugar incluso se nese estadio o UvrC xa se disociou, xa que o UvrB pode estar implicado na prevención do reapareamento de bases (reannealing) do ADN escindido.
  7. A ADN polimerase I entra agora e enche a secuencia de nucleótidos correcta, expulsando a UvrB no proceso, e a ADN ligase completa o último enlace fosfodiéster.

Notas[editar | editar a fonte]

  1. Grossman L, Yeung AT (1990). "The UvrABC endonuclease system of Escherichia coli--a view from Baltimore". Mutat Res. 236 (2-3): 213–21. doi:10.1016/0921-8777(90)90006-q. 
  2. Verhoeven, Esther E. A.; Wyman, Claire; Moolenaar, Geri F.; Goosen, Nora (2002-08-01). "The presence of two UvrB subunits in the UvrAB complex ensures damage detection in both DNA strands". The EMBO journal 21 (15): 4196–4205. ISSN 0261-4189. PMC 126143. PMID 12145219. doi:10.1093/emboj/cdf396. 
  3. "uvrB - UvrABC system protein B - Escherichia coli (strain K12) - uvrB gene & protein". www.uniprot.org. Consultado o 2016-02-28. 
  4. Verhoeven, E. E.; van Kesteren, M.; Moolenaar, G. F.; Visse, R.; Goosen, N. (2000-02-18). "Catalytic sites for 3' and 5' incision of Escherichia coli nucleotide excision repair are both located in UvrC". The Journal of Biological Chemistry 275 (7): 5120–5123. ISSN 0021-9258. PMID 10671556. doi:10.1074/jbc.275.7.5120. 

Véxase tamén[editar | editar a fonte]

Outros artigos[editar | editar a fonte]

Ligazóns externas[editar | editar a fonte]