Duma Estatal

A Duma Estatal (en ruso: Государственная дума, tr.: Gosudárstvennaya duma, abreviatura habitual: Госдума, tr.: Gosduma) é a cámara baixa da Federación Rusa, onde o parlamento se coñece como Asemblea Federal de Rusia, sendo a cámara alta o Consello da Federación Rusa. A súa sede está en Moscova.

Poderes da Duma Estatal

A Duma Estatal ostenta os seguintes poderes:

aprobar leis federais (por maioría dos deputados) e leis constitucionais, que deben ser aprobadas polo Consello da Federación Rusa e firmadas polo Presidente de Rusia.
anular o veto do Consello da Federación Rusa a unha lei federal por maioría de dous terzos.
anular o veto do Presidente de Rusia a leis federais por maioría de dous terzos xunto con tres cuartas partes dos votos dos membros do Consello da Federación Rusa.
comezar o procedemento de censura contra o Presidente de Rusia por maioría de dous terzos.

Segundo a Constitución da Federación Rusa de 1993, a Duma Estatal está composta por 450 deputados (artigo 95), elixidos para un período de catro anos (artigo 96). Os cidadáns rusos a partir de 21 anos poden ser elixidos para a Duma (artigo 97).