Dukla Praga

Na Galipedia, a Wikipedia en galego.
Dukla Praga
NomeDukla Praha
Fundación1948
Desaparición1996
EstadioStadion Juliska,
Praga, República Checa
Inauguración1960
Capacidade18.000
Na casa
Fóra

O Dukla Praga (en checo: Dukla Praha) foi un club de fútbol checo da cidade de Praga. Fundado en 1948 co nome de ATK Praha, gañou un total de 11 títulos da liga checoslovaca e oito Copas de Checoslovaquia, e na tempada 1966/67 acadou as semifinais da Copa de Europa. Xa en 1985/86 chegou ás semifinais da Recopa de Europa. Aportou sete xogadores á selección de Checoslovaquia que quedou subcampioa na Copa do Mundo de 1962 en Chile, nun ano no que o club gañou o quinto dos seus títulos de liga nacional e no que ademais o seu xogador Josef Masopust recibiu o Balón de Ouro.

Historia[editar | editar a fonte]

O Dukla Praga foi fundado en 1948 co nome de Armádní tělovýchovný klub Praha, abreviado como ATK Praha, e comezou a súa traxectoria na máxima división do fútbol checoslovaco.[1][2] Estaba dirixido polo exército checoslovaco e contaba con seccións de sete deportes diferentes.[3] O club cambiou o seu nome a Ústřední dům armády Praha ou UDA Praha en 1953, e esa mesma tempada gañou o primeiro dos seus 11 títulos da liga checoslovaca.[1][2] Repetiu título en 1956, ano no que mudou o seu nome a Dukla Praha, en homenaxe aos caídos na batalla do paso de Dukla en 1944.[2] Na tempada 1957/58 proclamouse campión checoslovaco por terceira vez, segunda consecutiva.

Na tempada 1960/61 naceu a Copa de Checoslovaquia e o Dukla Praga foi o seu primeiro campión, ao derrotar na final ao Dynamo Žilina, título ao que sumou unha cuarta liga ese mesmo ano.[2][4] O club estivo a piques de conquistar de novo ambos títulos en 1962, cando gañou a liga pero perdeu na final da Copa ante o Slovan Bratislava.[2][4] Ese mesmo ano celebrouse o Mundial de Chile, e o Dukla aportou sete xogadores á selección de Checoslovaquia que chegou á final, na que caeu ante o Brasil.[5] A estrela do Dukla, Josef Masopust, marcou un dos goles na final, e máis tarde recibiu o Balón de Ouro como mellor futbolista europeo. O Dukla gañou dúas ligas máis nos dous seguintes anos, facendo un total de catro consecutivas. Na tempada 1964/65 gañou unha nova Copa e na 1965/66 repetiu Copa e liga.[2] O último título para o Dukla na década de 1960 foi a Copa Checoslovaca 1968/69.[4]

O formato da competición de Copa cambiou despois da tempada 1968/69, e non foi ata a 1980/81 cando o Dukla sumou outro título, repetindo logro nas tempadas 1982/83, 1984/85 e 1989/90.[4] Na 1985/86, o club conseguiu a maior goleada da súa historia, nunha vitoria por 10-0 contra o Dynamo České Budějovice.[6]

En competicións internacionais[editar | editar a fonte]

Dende o nacemento da Copa de Europa en 1955 ata 1991, o Dukla disputou máis partidos en dita competición (45) que calquera outro equipo de Checoslovaquia.[7] Os cinco xogadores da liga checoslovaca con máis participacións na competición antes de que pasase a chamarse Liga de Campións, foron todos xogadores do Dukla: Josef Masopust, Jozef Adamec, Jiří Čadek, Josef Vacenovský e Dušan Kabát.[7]

Época da República Checa[editar | editar a fonte]

En 1994 púxose fin á longa asociación do club cos militares e ao mesmo tempo o equipo perdeuse a súa condición de equipo de primeira división.[3] O Dukla terminou último na Primeira Liga Checa 1993/94, nunha tempada na que pasaron ata tres adestradores polo banco.[8] O club gañou só un partido en toda a tempada, contra o Hradec Králové, e chegou a perder 7-0 ante o Viktoria Žižkov.[6][8] Na seguinte tempada (1994/95) militou na liga de fútbol de Bohemia, rematando no terceiro lugar detrás do SK Chrudim e Pelikán Děčín.[8] Tampouco conseguiu o ascenso na tempada 1995/96, quedando de novo terceiro, esta vez por detrás do Atlantic Lázně Bohdaneč e do Česká Lípa.[8]

En 1996 fusionouse co equipo de segunda división FC Portál Příbram.[3][8] O novo club, que máis tarde se pasou a chamar 1. FK Příbram xogou unha tempada no Juliska de Praga antes de mudarse ao Příbram en 1997.[9]

Reforma e retorno[editar | editar a fonte]

O nome de Dukla Praga desapareceu do fútbol checo durante varios anos, pero non para sempre. O Dukla Dejvice, un equipo local de Praga fundado en 1959, comezou a xogar no estadio Juliska e adoptou as cores amarela e vermella de Dukla Praga.

O club entrou no Campionato de Praga en 2001 e cinco anos despois, a dirección do Dukla Praga anunciou que aceptara facerse cos dereitos do Jakubčovice, de Segunda División.[10] O histórico club volveu á máxima división checa en 2011.

Adestradores[editar | editar a fonte]

Esta é a lista dos adestradores do club.[11]

Palmarés[editar | editar a fonte]

  • Primeira Liga Checoslovaca (11): 1953, 1956, 1957/58, 1960/61, 1961/62, 1962/63, 1963/64, 1965/66, 1976/77, 1978/1978, 1978/1971.[2]
  • Copa de Checoslovaquia (8): 1960/61, 1964/65, 1965/66, 1968/69, 1980/81, 1982/83, 1984/85, 1989/90.[2]
  • International Soccer League (1): 1960.

Notas[editar | editar a fonte]

  1. 1,0 1,1 Pivoda 2013, p. 7.
  2. 2,0 2,1 2,2 2,3 2,4 2,5 2,6 2,7 Jeřábek 2007, p. 162.
  3. 3,0 3,1 3,2 "Dukla returns" (en inglés). 6 de decembro de 2006. Arquivado dende o orixinal o 15 de xuño de 2013. Consultado o 17 de xuño de 2022. 
  4. 4,0 4,1 4,2 4,3 Jeřábek 2007, pp. 233-234.
  5. "Masopust vzpomíná, jak se v jedenašedesátém málem musel zastřelit" (en checo). 22 de outubro de 2012. Consultado o 17 de xuño de 2022. 
  6. 6,0 6,1 Pivoda 2013, p. 28.
  7. 7,0 7,1 Jeřábek 2013, p. 244.
  8. 8,0 8,1 8,2 8,3 8,4 Pivoda 2013, p. 99.
  9. Pivoda 2013, p. 100.
  10. "Dukla do druhé ligy!" (en checo). 19 de novembro de 2006. Arquivado dende o orixinal o 27 de setembro de 2007. Consultado o 17 de xuño de 2022. 
  11. Pivoda 2013, p. 36.

Véxase tamén[editar | editar a fonte]

Bibliografía[editar | editar a fonte]

  • Horák, Jindřich; Král, Lubomír (1997). Encyklopedie našeho fotbalu : Sto let českého a slovenského fotbalu. Domácí soutěže (en checo). Praga. ISBN 80-85983-22-2. 
  • Jeřábek, Luboš (2007). Český a československý fotbal – lexikon osobností a klubů (en checo). Praga: Grada Publishing. ISBN 978-80-247-1656-5. 
  • Pavel, Ota (2004). Dukla mezi mrakodrapy (en checo) 1. Slávka Kopecká. ISBN 80-86631-14-1. 
  • Pivoda, Aleš (2013). Legenda se vrátila Praha (en checo). MAC. ISBN 978-80-86783-65-9. 
  • Sigmund, Stanislav (1998). FC Dukla 1948–1998 (en checo). Praga: 1998. ISBN 80-86284-00-X.