Dragon (nave espacial)
Dragon é o nome dunha nave espacial non tripulada da empresa SpaceX. Úsase para levar e traer carga a e desde a Estación Espacial Internacional baixo un contrato coa NASA.[1][2][3][4]
Características[editar | editar a fonte]
A cápsula Dragon foi desenvolvida por SpaceX tras ser unha das gañadoras da competición Commercial Orbital Transportation Services (COTS) da NASA de setembro de 2006. COTS asignou varias cantidades de diñeiro a varias empresas para proporcionar un servizo de avituallamento á Estación Espacial Internacional despois da posta fóra de servizo dos transbordadores espaciais. Inicialmente se asignaron 278 millóns de dólares para tres voos de desmostración.
As cápsulas lánzanse mediante foguetes Falcon 9 e constan de catro partes: o morro en forma de cono, que protexe o resto da nave durante o ascenso; a sección presurizada, que acolle a carga presurizada; e a sección de servizo, que contén a aviónica, o sistema de control a reacción, formado por 18 propulsores hipergólicos, os paracaídas e outra infraestrutura; e sección non presurizada, no que hai carga que pode ir exposta ao baleiro e que sostén os paneis solares que proporcionan enerxía á nave. A cápsula está deseñada para ser autónoma e poder acoplarse coa estación de maneira automática. Ten un volume presurizado de 18 m3 e unha capacidade de carga de 2500 kg. A nave protéxese durante a reentrada por un escudo térmico ablativo, amarando suavemente grazas aos seus paracaídas.
Desde o inicio do seu desenvolvemento creáronse varias versións da cápsula Dragon.
Versións[editar | editar a fonte]
Versión de cualificación[editar | editar a fonte]
A unidade de cualificación foi un modelo estrutural da cápsula que serviu de carga útil no voo inaugural do Falcon 9. Foi lanzada o 4 de xuño de 2010 e permaneceu unida a propósito á última etapa do foguete Falcon 9. Carecía de equipamento e instrumentación e non foi deseñada para regresar intacta á Terra. Reentrou na atmosfera o 27 de xuño de 2010.
Dragon C1[editar | editar a fonte]
A Dragon C1 foi un prototipo simplificado da cápsula final lanzado o 8 de decembro de 2010 nun voo de 4 horas. Esta nave non levaba paneis solares nin o sistema de acoplamento que levaría a versión definitiva. A sección non presurizada permaneceu acoplada á última etapa do Falcon 9, a diferenza dos voos operativos, co que só a cápsula se separou do foguete. Deu dúas voltas completas á Terra, despois das cales reentrou na atmosfera e amarou na costa oeste de México. Foi posta en exposición nas instalacións de SpaceX.
Dragon C2[editar | editar a fonte]
É a versión operativa da cápsula. Lanzáronse 20 cápsulas Dragon C2 entre o 22 de maio de 2012 e o 5 de decembro de 2019. Unha delas perdeuse o 28 de xuño de 2015 polo fallo do foguete Falcon 9.
Historial de lanzamentos da Dragon C2[editar | editar a fonte]
| Voo | Data | Resultado | Notas |
|---|---|---|---|
| Dragon C102 | 22 de maio de 2012 | Éxito | Primeiro voo dunha Dragon C2. |
| Dragon CRS-1 | 8 de outubro de 2012 | Éxito | |
| Dragon CRS-2 | 1 de marzo de 2013 | Éxito | |
| Dragon CRS-3 | 18 de abril de 2014 | Éxito | |
| Dragon CRS-4 | 21 de setembro de 2014 | Éxito | |
| Dragon CRS-5 | 10 de xaneiro de 2015 | Éxito | |
| Dragon CRS-6 | 14 de abril de 2015 | Éxito | |
| Dragon CRS-7 | 28 de xuño de 2015 | Fallo | Aos 2 minutos e 19 segundos o foguete estalou debido a un problema de sobrepresión na segunda etapa. |
| Dragon CRS-8 | 8 de abril de 2016 | Éxito | |
| Dragon CRS-9 | 18 de xullo de 2016 | Éxito | |
| Dragon CRS-10 | 19 de febreiro de 2017 | Éxito | |
| Dragon CRS-11 | 3 de xuño de 2017 | Éxito | |
| Dragon CRS-12 | 14 de agosto de 2017 | Éxito | |
| Dragon CRS-13 | 15 de decembro de 2017 | Éxito | |
| Dragon CRS-14 | 2 de abril de 2018 | Éxito | |
| Dragon CRS-15 | 29 de xuño de 2018 | Éxito | |
| Dragon CRS-16 | 5 de decembro de 2018 | Éxito | |
| Dragon CRS-17 | 4 de maio de 2019 | Éxito | |
| Dragon CRS-18 | 25 de xullo de 2019 | Éxito | |
| Dragon CRS-19 | 5 de decembro de 2019 | Éxito |
Notas[editar | editar a fonte]
- ↑ Mark Wade (2011). "Dragon" (en inglés). Consultado o 9 de decembro de 2019.
- ↑ Gunter Dirk Krebs (2019). Gunter's Space Page, ed. "Dragon Qualifiaction Unit" (en inglés). Consultado o 9 de decembro de 2019.
- ↑ Gunter Dirk Krebs (2019). Gunter's Space Page, ed. "Dragon C1" (en inglés). Consultado o 9 de decembro de 2019.
- ↑ Gunter Dirk Krebs (2019). Gunter's Space Page, ed. "Dragon C2, CRS-1,... CRS-20 (SpX 1,... 20)" (en inglés). Consultado o 9 de decembro de 2019.
Véxase tamén[editar | editar a fonte]
 |
Wikimedia Commons ten máis contidos multimedia na categoría: Dragon  |
