Diamantina Rodríguez

Na Galipedia, a Wikipedia en galego.
Saltar ata a navegación Saltar á procura
Diamantina Rodríguez
Nacemento1920
 Quirós
NacionalidadeEspaña
Ocupacióncantante
editar datos en Wikidata ]

Diamantina Rodríguez, nada en Vil.laxime (Quirós) en 1920, é unha cantante asturiana de tonada, máis coñecida como Diamantina.

Traxectoria[editar | editar a fonte]

De nena escoitou nun gramófono a voz de Obdulia Álvarez Díaz "La Busdonga", que se converteu no seu referente. En 1939 tresladouse co seu marido, o gaiteiro quirosán Argimiro Fernández Álvarez, á localidade de San Nicolás (Soto Ribera, La Ribera). En 1948 participou por vez primeira no concurso de tonadas organizado polo xornal Región. Isto serviulle para darse a coñecer e para coñecer José Menéndez Carreño "Cuchichi", membro do xurado e que se converteu no seu mestre. En 1950 asentouse en Mieres. En 1955 gañou o concurso de Región.

En 1969 gravou o seu primeiro disco, e en 1971 editou outro dedicado ao cancioneiro de Eduardo Martínez Torner. En 1972 publicou La verde Asturias, e en 1973 Canciones asturianas. En 1981 gravou A las madres de los mineros, que amais de tonadas incluía xiraldilles, vaqueiradas e anadas.

Colaborou no cantar "A la madre del mineru", no disco de Rosario González De L.laciana vengo (2004). Nese mesmo ano interviu no disco editado pola Dirección Xeneral de la Muyer do Goberno de Asturias, Con voz de muyer, no que tamén participaban entre outras Anabel Santiago, Liliana Castañón, Marisa Valle Roso e Rosario González.

Recoñecementos[editar | editar a fonte]

En 2002 recibiu a medalla de Asturias que concede o Goberno do Principado, na categoría de prata, como recoñecemento á súa traxectoria artística e a contribución á recuperación do patrimonio musical asturiano. Desde 2003 forma parte do xurado do Memorial Silvino Argüelles.